शुक्रबार, बैशाख १५, २०७४ साल
KTM: Sunny
logo

विद्युत प्राधिकरणका सञ्चालकहरु हटाउने निर्णय सर्वोच्चले उल्ट्याइदियो, उर्जामन्त्रीलाई ठूलो धक्का

कर्पोरेट नेपाल २०७३ पौष १३ गते 72.91K

काठमाडौंः नेपाल विद्युत प्राधिकरणका सञ्चालकहरुलाई हटाउने उर्जामन्त्री जनार्दन शर्माको निर्णयलाई सर्वोच्च अदालतले रोकिदिएको छ । सर्वोच्चले अन्तरिक आदेश जारी गर्दै प्राधिकरणका तीन जना सञ्चालकहरुलाई हटाउने निर्णय कार्यान्वयन नगर्न अन्तरिम आदेश जारी गरेको हो । 

उर्जामन्त्री शर्माले प्राधिकरणका सञ्चालकत्रय लक्ष्मण अग्रवाल, मनोज मिश्र र सुरज लामिछानेलाई पदीय आचरणअनुसार काम नगरेको भन्दै स्पष्टिकरण सोधेर हटाएका थिए । हटाएकै दिनमा उनले माओवादीका दुई कार्यकर्ता र एक काँग्रेसनिकटलाई प्राधिकरण सञ्चालक समितिमा नियुक्त गरेको थिए । 

सर्वोच्चका न्यायधीस प्रकाश राउतको एकल इजलाशले बुधबार उर्जा मन्त्रालयको निर्णय कार्यान्वयन नगर्न सरकारलाई आदेश जारी गरेको हो । यसले मन्त्री शर्मालाई ठूलो धक्का लागेको छ भने उनले नियुक्त गरेका सञ्चालकहरु भक्तबहादुर पुन, चेतराज जोशी र उमेश थानीले एक महिना पनि सञ्चालक हुन नपाई हटन बाध्य भएका छन् । 

उर्जामन्त्री शर्माले ल्याएका सञ्चालकहरु नियुक्त हुनासाथै गैरकानुनी नियुक्ति गरिएको भन्दै प्राधिकरणका युनियनहरुले विरोध जनाएका थिए । उनीहरुलाई नियुक्त गरेको भोलिपल्टै उर्जामन्त्री शर्माले प्राधिकरणका ६२ जटा एजेण्डाहरु पास गराएका थिए । 

पुर्नबहाली भएका सञ्चालकहरुमा लामिछाने यसअघि पनि अदालतकै आदेशमा पुर्ननियुक्ति पाएका व्यक्ति हुन । उनीहरुको कार्यकाल आउँदो चैतसम्म रहे पनि मन्त्री शर्माले आफू अनुकुल काम गर्न भन्दै अग्रवाल, मिश्र र लामिछानेलाई हटाएर आफ्नो पार्टी निकटहरुलाई ल्याएका थिए ।  

यो पनि पढनुहोसः
विद्युत प्राधिकरणका नयाँ सञ्चालकहरु पनि विवादित, कानुन मिचेर नियुक्ति गरिएको गुनासो

तपाईं हामीसंग फेसबुकट्वीटर मार्फत् पनि जोडिन सक्नुहुन्छ ।

तपाईको प्रतिक्रिया

Copyrights © 2017 Bizcare Nepal Pvt. Ltd.

Friday, Apr 28, 2017