काठमाडौं । प्रदेश नं.३ सरकारले आर्थिक वर्ष २०७५/७६ मा पशुपालनका लागि करिब ६ करोड अनुदान वितरण गरेको छ ।
कृषि उत्पादन र पशुपालनमार्फत प्रदेशको आर्थिक समृद्धिको आधार तयार हुने विश्वासका साथ प्रदेश सरकारले अनुदान स्वरुप सो रकम वितरण गरेको हो । प्रदेश ३ को भूमि व्यवस्था कृषि तथा सहकारी मन्त्रालयले आर्थिक वर्ष २०७५/७६ मा पशु अनुदान शीर्षकअन्तर्गत ६ करोड ५२ लाख वितरण गरेको जनाएको छ । पशु व्यवसाय विकास तथा विस्तारका लागि मन्त्रालयले प्रदेशअन्तर्गत पर्ने १३ वटै जिल्लाका किसानलाई निश्चित कार्यविधि बनाएर अनुदान रकम वितरण गरेको हो ।
मन्त्रालयले दूधमा अनुदानस्वरुप प्रतिलिटर २५ पैसाको दरले सात वटा जिल्लाको एक सय ४९ वटा सहकारीमा एक करोड पचास लाख वितरण गरेको जनाएको छ । जसमा चितवनको ७४ मकवानपुर काभ्रे र ललितपुरको २२/२२ दोलखाको दुई धादिङ र नुवाकोटको एक/एक वटा सहकारी छन् ।
मन्त्रालयकी पशु विकास शाखा अधिकृत डा सबिना मिश्रका अनुसार मन्त्रालयले दूधमा प्रतिलिटर एक रुपियाँ अनुदान दिने भनिए पनि रकम अभावका कारण २५ पैसा मात्रै वितरण गरिएको छ ।
चितवन, दोलखा र मकवानपुरमा तीनवटा दाना उद्योग सञ्चालनका लागि एक करोड ६५ लाख ५४ हजार अनुदान वितरण गरिएको डा. मिश्रले बताए । मन्त्रालयले चितवन, ललितपुर र हेटौँडामा तीनवटा पशु बधशाला निर्माणका लागि पनि बजेट दिएको छ । तीन जिल्लामा बधशालाका लागि एक करोड पचास लाख प्रदान गरिएको मन्त्रालयले जनाएको छ ।
त्यसैगरी प्रदेशभर १३ वटा पशु बधस्थल निर्माणका लागि ८६ लाख ७६ हजार खर्च भएको छ । प्रदेश मन्त्रालयले चितवन र धादिङमा तीन/तीन सिन्धुली र दोलखामा एक/एक तथा ललितपुरमा पाँच पशु बधस्थल निर्माणमा उक्त रकम खर्च भएको जनाइएको छ ।
प्रदेशका तीन वटा जिल्लामा २३ वटा चिलिङ भ्याट खरिद गर्नका लागि एक करोड पचास लाख बजेट पठाएको मन्त्रालयले जनाएको छ । चितवनमा मात्रै १७ वटा चिलिङ भ्याटका लागि रकम दिइएको छ भने ललितपुरमा दुई मकवानपुर काठमाडौँ सिन्धुली सिन्धुपाल्चोक र ललितपुरमा एक/एक वटा चिलिङ भ्याट खरिदमा अनुदान दिइएको मन्त्रालयले जनाएको छ ।
मन्त्रालयले २० वटा मिल्क एनलाइजर खरिद गर्नका लागि ९८ लाख २७ हजार विभिन्न पाँच वटा जिल्लामा अनुदानस्वरुप रकम वितरण गरेको छ । जसअनुसार चितवनमा १३ मकवानपुरमा तीन काठमाडौँमा दुई धादिङ र दोलखामा एक/एक वटा मिल्क एनालाइजर खरिद गरिएको बताए ।
