गैरआवासीय नेपाली संघले लाप्राकबाट हात नझिक्ने

Advertisement

गोरखा । गैरआवासीय नेपाली सङ्घ (एनआरएनए)का नवनिर्वाचित अध्यक्ष कुमार पन्तले गोरखाको लाप्राकमा भूकम्पपछि निर्माण भइरहेको एकीकृत नमूनाबस्ती निर्माणको कामबाट आफूहरुले हात नझिकेको बताएका छन् ।

सदरमुकाममा शनिबार पत्रकारहरुसँगको भेटघाटमा अध्यक्ष पन्तले गुप्सीपाखामा निर्माणाधीन एकीृकत बस्ती निर्माणको काम अन्तिम चरणमा पुगिसकेको भन्दै अबको दुई महीनाभित्र निर्माणको काम सम्पन्न हुने बताए ।

पन्तले भने, “लाप्राकको गुप्सीपाखामा एनआरएनएले निर्माण अघि बढाएको नमूनाबस्ती निर्माणको कामबाट पछि हट्ने कुरै हुँदैन् । हामीले राष्ट्रिय पुनःनिर्माण प्राधिकरणसँग सम्झौता गरेका छौँ, सम्झौताअनुसार काम सम्पन्न गर्छौं ।” उनले लाप्राकको नमूनाबस्ती निर्माणका क्रममा त्यहाँ स्थानीयवासीले उपलब्ध गराउनुपर्ने केही सामग्री उपलब्ध गराउन ढिलाइ भएका कारण पुनःनिर्माणको काममा ढिलाइ भइरहेको बताए ।

एकीकृत नमूनाबस्तीमा पर्खाल लगाउने लगायतका भौतिक संरचना निर्माणका विषयमा छलफल भइरहेको भन्दै उनले बस्तीको बीचमा सडक निर्माण लगायतका केही विषयमा अहिले प्राधिकरणसँग कुराकानी गरिरहेको बताए । पन्तले भने, “प्राधिकरणसँग भएको सम्झौताअनुसार केही घरमा तला थप्ने काम बाँकी छ । शौचालय निर्माणको काम पनि लगभग अन्तिम चरणमा छ, ७० घरको शौचालय निर्माण भइसक्यो । तीन सय घरका लागि खाल्डो खनेर डिपिसीको काम सकिएको छ ।”

अबको दुई महीना भित्रमा लाप्राकमा एकीकृत नमूना बस्ती निर्माणका लागि राष्ट्रिय पुनःनिर्माण प्राधिकरणसँग सम्झौता भएअनुसार गैरआवासीय नेपाली सङ्घलाई दिएका सबै जिम्मेवारी पूरा गर्ने अध्यक्ष पन्तले बताए । उनले भने, “हामी हाम्रो सबै जिम्मेवारी पूरा गरी काम सकेर छिटोभन्दा छिटो हस्तान्तरण गर्ने प्रक्रियामा छौँ ।”

अध्यक्ष पन्तले सङ्घले गाउँपालिकासँग गरेका सम्झौताअनुसार लाभग्राहीले उपलब्ध गराउने भनिएको काठ तथा शौचालय निर्माणका लागि खाडल छिटो खन्नका लागि सहयोग गरिदिन आग्रह गरिएको बताए । उनले भने, “लाभग्राहीले शौचालय निर्माण आफँै सम्पन्न गर्न चाहनुहुन्छ भने पनि एनआरएनएले एकमुष्ट त्यही बराबरको रकम उपलब्ध गराउने विषयमा गाउँपालिकासँग छलफल भइरहेको छ ।”

Advertisement

Advertisement

Advertisement