काठमाडौँ । एनआईसी एशिया बैंक लिमिटेडकोे सहायक कम्पनी एनआईसी एशिया लघुवित्त वित्तीय संस्था लि.को दोस्रो साधारण सभा सम्पन्न भएको छ । सञ्चालक समितिका अध्यक्ष अर्जुनराज खनियाको अध्यक्षतामा सोमबार ट्रेड टावर थापाथली, काठमाडौंमा सम्पन्न भएको हो ।
साधारण सभाले सञ्चालक समितिको प्रतिवेदन सहित आव २०७५/७६ को वित्तीय विवरण पारित गर्दै नियामक निकायहरु लगायतका कार्यालयहरुबाट आवश्यक स्वीकृति प्राप्त भए पश्चात आइपीओ निष्काशन गर्ने निर्णय गरेको छ ।
साथै, सोमबार गते बसेको एनआईसी एशिया लघुवित्त वित्तीय संस्थाको ३९औं सञ्चालक समितिको बैठकले कपिल ढकाललाई सञ्चालक समितिको अध्यक्ष चयन गरेको छ । ढकाल हाल बैंकको सहायक प्रमुख कार्यकारी अधिकृत पदमा कार्यरत रहेका छन् । अध्यक्ष ढकालसँग आईसीआईसीआई बैंक तथा विश्व प्रसिद्ध परामर्शदाता कम्पनी डीलोईटीमा कार्य गरेको र हाम्रो विकास बैंक लि.को प्रमुख कार्यकारी अधिकृत भई कार्य गरेको अनुभव पनि रहेको छ ।
ढकालले मंगलबार नेपाल राष्ट्र बैंक, बैंक तथा वित्तीय संस्था नियमन विभागका कार्यकारी निर्देशक देवकुमार ढकालबाट पद तथा गोपनियताको शपथ ग्रहण गरेका छन् । उक्त शपथ ग्रहण कार्यक्रममा नेपाल राष्ट्र बैंक, बैंक तथा वित्तीय संस्था नियमन विभागका निर्देशक वीरेन्द्रदत्त अवस्थी, एनआईसी एशिया बैंकका प्रमुख कार्यकारी अधिकृत रोशनकुमार न्यौपाने र एनआईसी एशिया लघुवित्तका वित्तीय संस्थाका निवर्तमान अध्यक्ष अर्जुनराज खनियाँ लगायतको उपस्थिति रहेको थियो ।
यस लघुवित्त वित्तीय संस्थाले स्थापनाको छोटो समयमै दुर्गम जिल्ला जाजरकोटमा रजिष्टर्ज कार्यालय स्थापना गरी वित्तीय पहुँच नपुगेका स्थानहरुलाई प्राथमिकता दिई मुलुकको १९ जिल्लाहरुमा ६१ शाखा कार्यालय स्थापना गरी विपन्न वर्गहरुलाई सहज वित्तीय सेवा प्रदान गर्दै आइरहेको सहायक प्रमुख कार्यकारी अधिकृत तथा प्रमुख सूचना अधिकारी सुबिनकाजी श्रेष्ठले जनाएका छन् ।
