काठमाडौ। भारतीय कम्पनी सतलज विद्युत निगमले निर्माण गरिरहेको ९०० मेगावाटको क्षमताको संखुवासभामा निर्माणाधीन अरुण तेस्रो जलविद्युत आयोजनाका लागि एक खर्ब एक अर्ब ३३ करोडको लगानी जुटेको छ । उक्त आयोजनाले बिहीबार फाइनान्सियल क्लोजीङको लागी पत्रकार सम्मेलन गरी ९०० मेगावाटको यो परियोजनाका लागि नबिल, एभरेष्ट बैंक र भारतीय बैंकले सहयोग गर्ने जानकारी दिएको हो ।
अरुण तेस्रोमा नेपालका नविल बैंक र एभरेष्ट बैंकले लगानी गर्न लागेका छन् भने भारतको भारतीय स्टेट बैंक (एसबीआई), पञ्जाब नेसनल बैंक, युनियन बैंक अफ इन्डिया र भारतीय एक्सपोर्ट इम्पोर्ट (एक्जिम) बैंकले ऋण लगानी गर्नेछन् । नेपालको एभरेष्ट बैंकले १० अर्ब २० करोड र नबिलले ५ अर्ब १२ करोड रुपियाँ लगानी गर्ने छन् भने भारतीय बैंकले ८६ अर्ब लगानी गर्नेछन् ।
हालसम्मकै सबैभन्दा ठूलो वैदेशिक लगानी हुन लागेको आयोजनाको कुल लागत १ खर्ब ४७ अर्बमध्ये भारतबाट मात्र १ अर्ब ३२ अर्ब लगानी हुनेछ । प्रर्वद्धक एसजेवीएन अरुण ३ पावर डेभलपमेन्ट कम्पनीले आयोजनाको निर्माण हुने सुरु गरिसकेको छ । आउँदो २०७९ असोजसम्म अर्थात सन २०२२ को सेप्टेम्बरमा सम्पन्न गर्ने लक्ष्य राखिएको आयोजनाको निर्माण कार्य भने सुरु भैसकेको छ ।
सन् २००८ मा प्रतिष्पर्धाको आधारमा सरकारले लाइसेन्स दिएको आयोजनाको सन् २०१४ मा आयोजना विकास सम्झौता (पीडीए) भएको थियो । परियोजनामा ७० प्रतिशत ऋण र ३० प्रतिशत स्वपुँजीमा निर्माण हुने छ । राजधानीमा बिहीबार औपचारिक रूपमा वित्तीय ब्यवस्था बारेमा सम्झौता हुँदैछ । लगानी बोर्डले बुधबार वित्तीय व्यवस्थाको स्वीकृति दिइसकेको छ।
भारतको एसबिआइका साथै कानरा बैंक, पञ्जाब नेशनल बैंक (पिएनबी), एक्जिम बैंक अफ इण्डिया र युनियन बैंकले ऋण लगानी गर्ने भएका छन् । यी बैंकले कुल ८५ अर्ब ९७ करोड रूपियाँ लगानी गर्ने छन् । वित्तीय ब्यवस्थापन प्रक्रियाकै चरणमा भएपनि परियोजनाको निर्माणको काम भने सुरू भइसकेको छ।