आन्तरिक उत्पादनकै हाराहारीमा अझै पनि भारतबाट विद्युत आयात, मा. तामाकोशी अन्योलमै

काठमाडौं । विद्युत उत्पादन थपिने क्रम जारी रहे पनि भारतबाट आयात हुने विद्युतमा भने कमी आउन सकेको छैन् ।

विद्युत प्राधिकरणको भार प्रेषण केन्द्रको बुधबारको विवरणअनुसार आन्तरिक उत्पादन ६९१ (प्राधिकरणका आयोजनाबाट ४५२ र निजी क्षेत्रबाट २३९) मेगावाट विद्युत उत्पादन हुँदा भारतबाट ५६१ मेगावाट विद्युत आयात भइरहेको छ । भारततर्फ निर्यात हुने गरेको विद्युत यतिबेला शुन्य छ ।

प्राधिकरणका प्रवक्ता प्रवल अधिकारीले यतिबेला नदीहरुमा पानीको बहाव निकै कम हुने बेला भएकोले न्यून क्षमतामा मात्रै विद्युत उत्पादन हुने भएकाले आयात उच्च हुनु स्वाभाविक भएको तर्क गरे । उनले भने– फागुनपछि मात्रै हिउँ पग्लिन थाल्छ । त्यसपछि मात्रै उत्पादन बढ्न थाल्छ । यति बेला त क्षमताको एक तिहाई मात्रै उत्पादन हुने बेला हो ।

अधिकारीले यो बर्ष जम्मा ८०–९० मेगावाट विद्युत थप भएको भन्दै यति थपिनुलाई धेरै भन्न नमिल्ने बताए । अहिले कुल आन्तरिक उत्पादन क्षमता एक हजार २७५ मेगावाट पुगेको छ । एउटा मात्रै रहेको जलाशययुक्त आयोजना कुलेखानीले सुख्खा यामको माग पूर्ति गर्नसक्ने अवस्था छैन् भने बहुप्रतिक्षित माथिल्लो तामाकोशी जलविद्युत आयोजना कहिले निर्माण सम्पन्न हुने हो ? अन्योलमै रहेको छ ।

यो आयोजनाको निर्माण अवधि र लागत अस्वाभाविकरुपमा बढ्दै गएको छ । माथिल्लो तामाकोशीको निर्माण सम्पन्न गर्ने अवधि पटक पटक सार्दै आएको प्राधिकरणलाई यस आयोजनाको बढ्दो लागत र समय टाउको दुखाईको विषय बन्दै आएको छ ।