काठमाडौँ । अवि पावर कम्पनी लिमिटेडको हकप्रद शेयर सोमबार नेपाल धितोपत्र बोर्डबाट स्वीकृत भएको छ । कम्पनी स्वंयले निर्माण शुरु गरेको ४० मेगावाट क्षमताको माथिल्लो चमेलिया निर्माणको लागि १ बराबर २ को हकप्रद जारी गर्न बोर्ड समक्ष निवदेन दिएको थियो ।
विद्युत नियमन आयोगको सिफारिशमा कम्पनीलाई चरण चरण गरी उक्त आयोजना निर्माणको लागि हकप्रद जारी गर्ने निर्णय अनुरुप कम्पनीलाई प्रथम चरणमा ५६ लाख ७० हजार कित्ता बापत रु ५६ करोड ७० लाख बराबरको हकप्रद शेयर जारी गर्ने स्वीकृती प्राप्त भएको हो ।
सो हकप्रद हाल कम्पनीको कायम चुत्ता पुँजी रु ११९.०७ करोडको १ बराबर ०.४७ कायम भएको छ । कम्पनी यस हकप्रद जारी गरि आगामी आर्थिक बर्षको शुरुवातमा ४० मे.वा क्षमताको माथिल्लो चमेलिया निर्माणको प्रगती विवरण सहित पुनः दोस्रो पटक हकप्रद जारीको लागी बोर्ड समक्ष निवेदन पेश गर्ने भएको छ । दोस्रो चरणको हकप्रद निष्काशनको लागि समेत कम्पनीले विद्युत नियमन आयोगबाट स्वीकृति प्राप्त गरिसकेको छ ।
कम्पनीले हाल ८.५ मेवाको नौगड गाढ आयोजना वि.स २०७२ साल भदौ देखि संचालन गरी विद्युत बिक्री गरिरहेको र ८ मे.वा को माथिल्लो नौगड गाढ आयोजना मिति २०७६ साल कात्तिकबाट संचालन गरी थप विद्युत बिक्री गरिरहेको छ । माथिल्लो चमेलिया आयोजना दार्चुला जिल्लामा अवस्थित छ, जहाँ कम्पनीले २ आयोजना निर्माण गरिसकेको हो ।
कम्पनीले ४० मेवा क्षमताको माथिल्लो चमेलिया निर्माणको कार्य लाई तीब्र रुपमा अघि बढाएको छ । आयोजनाको वित्तिय व्यवस्थापनको कार्य अन्तिम रुपमा रहेको र उक्त आयोजनाको निर्माण अबको ३० महिना भित्र सम्पन्न गर्ने कम्पनीका कार्यकारी संचालक संजिव न्यौपानेले बताए । कम्पनीले बिगत ३ बर्ष देखि नियमित लाभांश वितरण गरिरहेको छ । कम्पनीले हकप्रद निष्काशनको प्रकृयामा रहेकोले यस आवको साधारणसभा ढिला भएको र यही आव २०७६ साल चैत्र महिना भित्र लाभांश सहितको साधारणसभा गरिने कम्पनीका कार्यकारी सञ्चालक न्यौपानेले जनाए ।
