रानीपोखरी पुनःनिर्माणमा अनुमति नलिई बिजुली प्रयोग, प्राधिकरणले गर्यो जरिवाना

,   ६ चैत्र २०७६, बिहीबार, ०४:११ pm   

काठमाडौँ । अनुमति नै नलिई ऐतिहासिक रानीपोखरीको पुनःनिर्माणमा विद्युत् प्रयोग भएको पाइएपछि नेपाल विद्युत् प्राधिकरणले कारवाही गरेको छ । प्राधिकरणको रत्नपार्क वितरण केन्द्रले रानीपोखरीको पुनःनिर्माण अनुमति नलिइ विद्युत् लिइएको पाइएपछि जरिवाना गरेको हो ।

केन्द्र प्रमुख प्रज्वलमान श्रेष्ठका अनुसार, रत्नपार्क वितरण केन्द्रको चुहावट नियन्त्रण टोलीले रानीपोखरीको छेउबाट गएको वितरण लाइनबाट प्रत्यक्ष हुकिङ गरी पुनःनिर्माणमा बिजुली प्रयोग भइरहेको फेला पारेको हो ।

उक्त टोलीले विद्युत् चोरी गरी प्रयोगमा ल्याएका पानी तान्ने मोटर, बत्तीत्तलगायतका उपकरण नियन्त्रणमा लिएको छ । रानीपोखरीको पुनःनिर्माण उपभोक्ता समितिबाट भइरहेको छ । स्थलगत अनुगमन प्रतिवेदन र एक वर्षको खपत विवरणलाई आधार मानी रु दुई लाख ९५ हजार ८९२ उपभोक्ता समितिबाट असुल गर्ने निर्णय भएको श्रेष्ठले जानकारी दिए । उनले प्रत्यक्ष हुकिङ गरेर रु एक लाख ४७ हजार ८२३ को विद्युत् चोरी भएको पाइएको बताए ।

aecc

प्राधिकरणले चोरी गरेको पाइएपछि शतप्रतिशत जरिवाना गर्दै लाइन काटिदिएको छ । यस्तै मूल्य अभिवृद्धिकरसहित रु दुई लाख ९५ हजार ८९२ बराबरको रकम असुल गर्ने तय गरिएको श्रेष्ठले बताए । कारवाही पछि मिटर राखी विद्युत् जडान गर्ने तयारी गरिएको छ ।