काठमाडौँ । विशेषगरी निजी अस्पतालहरुले पछिल्ला दिनमा बिरामीको उपचार गर्न अटेर गरेको व्यापक गुनासो बढेपछि यस्ता अस्पतालहरुलाई कारवाही गर्ने सरकारले चेतावनी दिएको छ ।
स्वास्थ्य मन्त्रालयले ज्वरो आएर अस्पताल पुगेका बिरामीहरुलाई चेकजाँच नै नगरी फर्काएर सास्ती दिएको गुनासो बढेपछि सरकारले त्यस्ता अस्पताललाई कडा कारवाहीको चेतावनी दिएको हो । स्वास्थ्य मन्त्रालयले आफ्नो हटलाइन नम्बरमा सामान्य बिरामी भएर अस्पताल जाँदा कोरोनाको आशंकामा उपचार नगरी फर्काउने गरेको उजुरी निकै आउने गरेको जनाएको छ । सामाजिक सञ्जालमा पनि त्यस्ता अस्पतालहरुको चर्को आलोचना भइरहेको छ ।
स्वास्थ्य मन्त्रालयका प्रवक्ता विकास देवकोटाका अनुसार कोरोना भाइरसका लागि सरकारले तोकेका अस्पतालले बिरामी लिन्न भन्न पाउँदैनन् । त्यस्ता अस्पतालले अनिवार्यरुपमा ज्वरो क्लिनिक राखेर बिरामीको थ्रोट स्वाब परीक्षणका लागि टेकुस्थित प्रयोगशालामा पठाउनुपर्छ।
आकस्मिक कक्षमा आएका बिरामी र ज्वरोका बिरामी त्यस्ता अस्पतालको अनिवार्य दायित्व भएको भन्दै उनले सरकारले कोभिड १९ का लागि तोकेकाबाहेक अन्य अस्पतालले पनि बिरामी आइहाले फर्काउन नमिल्ने बताएका छन् । अहिलेको संकटमा निजी र सामुदायिक अस्पतालले समेत ज्वरोका बिरामी आउँदा फिर्ता गर्न नमिल्ने भन्दै देवकोटाले यदि फिर्ता गरिए कडा कारवाही हुने बताएका छन् ।
