‘१०/१० कित्ता किनबेच गरेर बजार घटाउनेहरुमाथी अनुसन्धान गरि कारवाही गर्छाै’

,   ३१ बैशाख २०७७, बुधबार, ०४:४६ pm   
bhisma_dhungana

लकडाउनका बीच दैनिक २ घण्टाका लागि सेयर कारोबार खुला गरिएको छ । हामीले दुई दिनको कारोबारलाई हेर्यौं । दुबै दिन नेप्सेमा नेगेटिभ सर्किट ब्रेक लागेको छ । बजार खोलेर किन घटाएको भन्ने आवाज पनि सुन्न थालेको छु । केहि समय अघिसम्म बजार किन बन्द गरेको भन्ने अनि अहिले फेरी किन खोलेको भन्ने ? यस्तो तर्क नआउनुपर्ने हो ।
बजार अलिअलि बढ्ने, घट्ने, तलमाथी भैरहन्छ ।

हामीले तीन दिन कारोबार गरेपछि बजार सञ्चालनको मोडालिटीबारे पुनर्विचार गर्ने भनेका छौं । सर्किट ब्रेकमा २ प्रतिशतको क्याप नलगाएको भए त सात प्रतिशतले नै घटाउने रहेछन् भन्ने पनि देखियो । मंगलबारको भन्दा बुधबारको कारोबारको ट्रेण्ड अलिकति फरक आएको छ । मंगलबार १०, २०, ५० कित्ता मात्रै सेयर किनबेच गर्नेहरु देखिएका थिए । तर बुधबार तीन चार सय कित्ता सेयर खरिद बिक्रि गर्ने लगानीकर्ताहरु पनि देखिएका छन् । कारोबार रकम थोरै भए पनि एउटै लगानीकर्ताले धेरै कित्ता सेयर किनबेच गरिरहेकाले बजार खोल्नुको औचित्य पुष्ठि हुन्छ ।

फेरी बजार एक दुई दिन घट्यो भनेर आत्तिनु पनि पर्दैन् । हामी भने बिहिबारको बजार हेरेपछि के गर्ने भन्ने निष्कर्षमा पुग्छौं । सरकारले सबै बजार बन्द गर्ने, आवत जावत बन्द गर्ने निर्णय गर्यो भने हामी पनि बजार बन्द गर्नेबारे सोचौँला । अहिलेकै अवस्था रह्यो भने बजारको क्रमलाई मात्रै नियन्त्रण गर्नुपर्ने हुन सक्छ ।

aecc

बजारमा अनावश्यक घट बढ हुन सक्छ भनेर नैं सर्किट ब्रेकमा २ प्रतिशतको क्याप लगाएका थियौं । दुई दिनको कारोबारमा बजार यसरी घट्ने अपेक्षा गरेका थिएनौं । यसरी लगातार घटिरहन्छ भन्ने लागेकै थिएन् । मंगलबार र बुधबार दुबै दिन कारोबार भएका सबै कम्पनीको सेयर ओरालो नै लागेको छ ।

मंगलबार असाध्यै सानो सानो कारोबार भएको थियो । बुधबार अलि ठूला कारोबार भएका छन् । बिहिबारको कारोबारको अवस्था अझै राम्रो बन्यो भने एक खाले मोडल बनाउँछौं । अहिलेकै क्रम जारी रह्यो भने अलि फरक ढंगले अघि बढ्ने सोँच बनाउँछौं ।

अहिले १०/१० कित्ता सेयर किनबेच गरेर बजार घटाउने नियत राखेका हुन कि भनेर अनुसन्धान गर्न लगाएका छौं । बजार घटाउने नियतले १०/१० कित्ता सेयर किनबेच गराएका हुन् भने कारवाही गर्छाै । नेप्सेलाई अध्ययन गर्न निर्देशन दिईसकेका छौं ।

लगानीकर्ताहरुका लागि यो सेयर किन्ने बेला हो । हिजो अस्ति १६०० मा बजार हुँदा किन्नेहरुले आज १२०० मा हुँदा किन नकिन्ने ? लगानीकर्ताहरुलाई बजारमा प्रवेश गर्ने र सेयर किन्ने समय हो भन्न चाहान्छु । विचार गरेर, सावधानीपूर्वक बजारमा प्रवेश गर्दा हुन्छ । लगानीकर्ताहरुले सोच विचार गरेर राम्रा सेयर उठाउने बेला हो । –नेपाल धितोपत्र बोर्डका अध्यक्ष ढुंगानासँग गरिएको कुराकानीमा आधारित)
हो ।