भारतमा प्रधानमन्त्री गरीब कल्याण योजना नोभेम्बरसम्म, ८० करोड जनताले निःशुल्क खाद्यान्न पाउने

,   १६ असार २०७७, मंगलवार, ०७:५६ pm   
मोदीकेयर

नयाँ दिल्ली । भारतीय प्रधानमन्त्री नरेन्द्र मोदीले सरकारले प्रधानमन्त्री गरीब कल्याण खाद्य योजनालाई नोभेम्बरको अन्त्यसम्म चालु राख्ने बताएका छन् । यस योजना अन्तर्गत गरीब र आवश्यक रहेका घर परिवार, जसको रासन कार्ड रहेको छ , लाई खाद्यान्न प्रदान गर्ने व्यवस्था गरिएको छ । भारतमा रासन कार्ड लिएका करिब ८० करोड नागरिक रहेका तथ्याङ्क रहेको छ ।

भारतमा जुलाईदेखि चाडपर्बको मौसम शुरू हुन्छ । त्यसैले चाडपर्बको यस मौसममा भारतीयहरूको खर्च बढ्ने हुँदा गरीब तथा आवश्यक पर्ने सबै नागरिकलाई महामारीको समयमा कुनै पनि अभावको सामना गर्नु नपरोस् भन्ने उद्देश्यका साथ विगत तीन महिनादेखि सञ्चालित उक्त योजनालाई नोभेम्बर अन्त्यसम्म सञ्चालन गर्ने र यसबाट ८० करोड जनताले निःशुल्क खाद्यान्न पाउने प्रधानमन्त्री मोदीले बताए ।

यो पाँच महिना प्रति परिवार पाँच किलोग्राम गहुँ वा चामल र एक किलोग्राम चना उपलब्ध गराउने मोदीले घोषणा गरेका हुन् । सरकारलाई यस योजनालाई थप गर्नका लागि करिब ९० हजार करोड थप खर्च लाग्ने बताइएको छ ।

aecc

भारतीय प्रधानमन्त्री मोदीले महामारीलाई मध्यनजर गर्दै विगत तीन महिना पनि उक्त योजना लागु भएको प्रसङ्ग उल्लेख गर्दै भने,“ जुन ३० मा सकिने महामारीमा उद्धार प्याकेजका रूपमा जारी योजनालाई लम्ब्याउँदा १.५ लाख करोड खर्च राज्यको खर्चमा जोडिनेछ ।”

भारतीय जनता पार्टी र प्रतिपक्षी भारतीय काङ्ग्रेसको सरकार भएका विभिन्न २१ राज्यले यो योजना सेप्टेम्बरसम्म लागु गर्नका लागि केन्द्र सरकारलाई आग्रह गरिसकेका छन् ।रासस/एएनआई