काठमाडौं । कृषि तथा पशुपन्छी विकासमन्त्री चक्रपाणि खनालले दशैंमा मासुको कुनै अभाव नहुने दावी गरेका छन् । सोमबार रिपोर्टर्स क्लबमा खनालले दशैंमा देशभरि कतै पनि मासुको अभाव नहुने स्पष्ट पारे ।
उनले भने, ‘काठमाडौं उपत्यकामा मात्रै ५५ हजार खसी बोका आवश्यक हो, ४० हजार खसी बोका आउने भैसके । अब हामीलाई पर्याप्त हुन्छ । मासुको कुनै अभाव हुँदैन् ।’ दशैं सुरु भएकोले सरकारले बजारमा अनुगमन बढाएको पनि खनालले सुनाए ।
चाडपर्व सुरु भएसँगै आपूर्तिमा असहजता भएको, व्यापारीको मनोमानी बढेको भन्ने गुनासो आएकोले कृषि मन्त्रालय र आपूर्ति मन्त्रालयले संयुक्त अनुगमन सुरु गरेको पनि उनको भनाई छ । खनालले भने, ‘आपूर्ति सहज बनाउनको लागि उद्योग, वाणिज्य तथा आपूर्ति मन्त्रालयले नियमित अनुगमन गरिरहेको छ ।’
काठमाडौंमा खसीको मासुको मूल्य अस्वभाविकरुपमा वृद्धि गरिएको भनेर गुनासो सुनिएकोले सरकारले खसीको यसको मूल्यवृद्धिबारे नियामन गरिरहेको उनले बताए । मन्त्री खनालले भने, ‘हामी यसबारेमा निरन्तर छलफलमा पनि छौं, सबै कुराको विचार गर्दा पनि खसीको मासुको मुल्य ११ सय भन्दा माथि जाने अवस्था छैन् । हामी कडाई गर्छौं ।’
मन्त्री खनालले मासुमा नेपाल आत्मनिर्भर हुने अवस्थामा रहेको दावी गरे । उनले भने, ‘हामीले आफ्नै उत्पादनले ७५ प्रतिशतसम्म धान्न सक्छौं । कुखुरामा आत्मनिर्भर छौं ।’ खसी, बोकाको मासुमा आत्मनिर्भर बन्नको लागि मन्त्रालयले यसपटक जोन, सुपरजोन चलाउने, लाईभ स्टक इनोभेसनमा पनि खसी, बोका उत्पादन र कृषिमा युवा कार्यक्रम गरेर तीन वटा कार्यक्रम सुरु गरेको खनालले सुनाए । आगामी तीन वर्षभित्र नेपाल खसी, बोकामा पनि आत्मनिर्भर हुने खनालको दाबी छ ।
आफूहरुले बजार अनुगमनको कामलाई तीव्रताका साथ अघि बढाईएको सुनाउँदै केही मिठाई पसलले गुणस्तरहीन सामान बेच्ने गरेकोले गुणस्तरीयता कायम गर्न कडा निर्देशन दिएको पनि खनालले स्पष्ट पारे । आवश्यक परे आफू पनि अनुगमनमा उपस्थित् हुने उनले विश्वास दिलाए । बजारमा कृत्रिम अभाव सिर्जना गर्नेलाई कडाभन्दा कडा कारबाही गर्ने खनालको चेतावनी छ ।
उनले भारत सरकारले प्याज निर्यात नगर्ने भनेर निर्णय गरेको भनेर बाहिर हल्ला भएपनि आधिकारिक रुपमा आफूहरुलाई यसबारेमा जानकारी नभएको स्पष्ट पारे । खनालले भने, ‘भारतलाई नै अभाव भएकोले उसले निर्यात नगर्ने निर्णय गरेको सुनियो, तर आधिकारिक जानकारी छैन् ।’
नेपालमा प्याजको आपूर्ति ८० देखि ९० प्रतिशत रहेकोले प्याजमा मूल्यवृद्धि हुने संभावना देखिएको पनि उनले सुनाए । तर, बजारमा कृत्रिम अभाव सिर्जना गर्ने कुरा मान्य नहुने भन्दै सरकार कडारुपमा प्रस्तुत हुने खनालले चेतावनी दिए ।
आफूहरुले क्वारेन्टाईन चेकजाँच गरेर नै खशी, बोका भित्र्याउने गरेको पनि उनले सुनाए । खनालले भने, ‘मासु जाँच ऐन–२०५५ अनुसार हामीले अनुगमन गरिरहेका छौं । तर, आपूर्ति असहज हुँदैन् । पर्याप्त व्यवस्था गरिएको छ । ढुक्क हुन म आम उपभोक्तालाई आग्रह गर्छु ।’ भेडा, च्याङग्रा आउने हुम्ला र जुम्लालगायतका उत्तरी भेगका नाका व्यवस्थित् बनाईएको पनि उनले स्पष्ट पारे । त्यस्तै, दूध, दही र घ्युको पनि पर्याप्त व्यवस्था गरिएको खनालले सुनाए ।
