शनिबार ८ बैशाख, २०८१ | Saturday Apr 20, 2024
काठमाडौँ । साताको पहिलो दिन आइतबारदेखि लगातार ओरालो लागेको सुनको मूल्यमा हिजो भारी गिरावट आए पनि आज पुनः बढेको छ । हिजो एकैदिन प्रतितोला ६ हजार २ सय रुपियाँ घटेको सुनको मूल्य आज पुनः प्रतितोला २ हजार ४ सय रुपियाँ बढेको छ ।
त्यसैगरी चाँदी पनि आज प्रतितोला ८५ रुपियाँ बढेको छ । चाँदी हिजो एकै दिन प्रतितोला २२५ रुपियाँ घटेको थियो ।
नेपाल सुनचाँदी व्यवसायी महासंघका अनुसार आज छापावाल सुनको मूल्य प्रतितोला ९७ हजार ८ सय रुपियाँ, तेजावी सुनको मूल्य प्रतितोला ९७ हजार ३ सय रुपियाँ र चाँदीको मूल्य प्रतितोला एक हजार २ सय ९५ रुपियाँमा निर्धारण गरिएको छ ।
हिजो भने छापावाल सुन प्रतितोला ९५ हजार ४ सय रुपियाँ, तेजावी सुन प्रतितोला ९४ हजार ९ सय रुपियाँ र चाँदी प्रतितोला एक हजार २ सय १० रुपियाँमा कारोबार भएको थियो ।
अन्तर्राष्ट्रिय बजारमा हिजो सुनको मूल्य घटेकोले र आज बढेकाले त्यसैको प्रभाव नेपाली बजारमा समेत देखिएको महासंघले जनाएको छ ।
