शनिबार ८ बैशाख, २०८१ | Saturday Apr 20, 2024
काठमाडौं । नेपाल उद्योग बाणिज्य महासंघले मंसिर ११ र १२ गते निर्वाचन गर्न अनुमति पाएको छ । गृह मन्त्रालयले पत्र लेखेरै महासंघलाई निर्वाचन गर्न अनुमति दिएको हो ।
बरिष्ठ उपाध्यक्षका उम्मेदवार किशोर प्रधानले मंसिर ११ र १२ गते निर्वाचन गर्ने अनुमति गृह मन्त्रालयबाट प्राप्त भएको जानकारी दिए ।
गृह मन्त्रालयले २५ जना भन्दा बढी भेला हुन नपाउने, सामाजिक दुरी कायम गर्नुपर्ने र स्वास्थ्यका मापदण्ड समेत पालना हुने गरि साधारण सभा गर्न अनुमति दिएको हो ।
महासंघ पदाधिकारी बैठकले सो मितिमा निर्वाचन गर्न सिफारिस गरेको थियो । सो सिफारिसलाई अनुमोदन गर्न तथा निर्वाचन सम्बन्धी थप तयारीका लागि महासंघले असोज १५ गते कार्य समितिको बैठक डाकेको छ ।
महासंघमा शेखर गोल्छा स्वतः अध्यक्ष बन्दैछन् । बरिष्ठ उपाध्यक्ष बन्नका लागि किशोर प्रधान र चन्द्र ढकालले प्यानलै खडा गरेर निर्वाचन लड्ने घोषणा गरिसकेका छन् ।
आगामी कार्यकालमा स्वतः अध्यक्ष बन्ने व्यवस्था अनुसार बरिष्ठ उपाध्यक्षका लागि निर्वाचनमा होमिएका प्रधानको प्यानलमा अञ्जन श्रेष्ठ, दिनेश श्रेष्ठ र सौरभ ज्योतिले उपाध्यक्षका लागि उम्मेदवारी घोषणा गरेका छन् । त्यस्तै, चन्द्र ढकालको प्यानलबाट उपाध्यक्ष पदहरुमा क्रमशः उमेशलाल श्रेष्ठ, गुणनीधि तिवारी र रामचन्द्र संघाईले निर्वाचन लड्दैछन् ।
