शेयर बजारमा आएका नयाँ लगानीकर्ता चाँडै आत्तिएर ‘पेनिक सेल’ भयोः ढकाल

काठमाडौं । नेपाल इन्भेष्टर्स फोरमका अध्यक्ष तुलसीराम ढकालले शेयर बजारमा ‘पेनिक सेल’ आएको बताएका छन् । सोमबार शेयर बजारमा उच्च गिरावट आएसँगै उनले कर्पोरेट नेपालसँगको कुराकानीमा हतार गरेर शेयर नबेच्न लगानीकर्तालाई आग्रह पनि गरे । 

केही दिनदेखि शेयर बजार ओरालो लाग्दै आएकोमा आज नेप्से परिसुचक ११४ अंकले घटेर दुई हजार ६९८ को हाराहारीमा आइपुगेको छ । यति धेरै अंकको गिरावट आउनुपर्ने कुनै खास कारण नरहेको भन्दै उनले भने, ‘शेयर बजारमा अहिले विशेषगरी नयाँ लगानीकर्ता प्रवेश गरेका छन् । नयाँ लगानीकर्ताले शेयर बजारको यति ठूलो क्रयास अहिलेसम्म देखेका छैनन् । यसले गर्दा उनीहरूले आत्मवल दरिलो बनाउन सकेका छैनन् ।’ 

बैंक तथा वित्तीय क्षेत्रमा तरलता संकुचन हुनु, सोही निहुँमा बैंकहरुले ब्याजदर वृद्धि गर्नु, राष्ट्र बैंकले पनि कर्जामा केही कडाई गर्नु, बजारमा नकारात्मक हल्ला हुनुले पनि असर परेको उनको बुझाई छ । तर अध्यक्ष ढकालले बैंकिङ क्षेत्रमा लामो समयसम्म तरलता अभाव नरहने बताए । 

उनी भन्छन्, ‘अहिले बैंक तथा वित्तीय संस्थामा तरलता घट्नाको कारण सरकारी खर्च रोकिएको छ । विदेशबाट आउने रेमिट्यान्स पनि केही घटेको छ । आज सरकारले बजेट पास गरेको छ । यसै पनि साउन–भदौ भनेको सरकारी खर्च कम हुने महिना हो । यता बैंकहरु पनि यो समयमा निक्षेप संकलनभन्दा कर्जा लगानी बढाउनतर्फ नै लागेका हुन्छन् । यो बेला बैंकहरुले कर्जा लगानी गरेर वर्ष भरि कमाउने भएकाले पनि तरलतामा केही दबाब परेको छ ।’

दशैमा विदेशबाट चाडपर्वको लागि आउने रेमिट्यास पनि बढ्ने भएकाले तरलतामा परेको चाप कम हुने ढकालको आशा छ । यता यो सर्वसाधारणले पनि धेरै खर्च गर्ने समय हो भन्दै उनले यसले पनि बजारमा पैसाको आपूर्ति केही बढ्ने बताए । बैंकहरुले बढाएको ब्याजदर अल्पकालिन भएकाले आत्तिनुपर्ने अवस्था नरहेको ढकालले बताए ।  

उनले दोस्रो बजारमा कारोबार भइरेहका सबै कम्पनीले धमाधम लाभांश वितरण गर्ने समय सुरु हुन लागेकोले अहिले शेयर होल्ड गर्न सके केही समयभित्रै लगानीकर्ताले लाभांश लिन पाउने बताए ।