बुधबार १२ बैशाख, २०८१ | Wednesday Apr 24, 2024
कर्णाली । खाद्य व्यवस्था तथा व्यापार कम्पनीले कर्णाली पठाएको चामलको गुणस्तरमा प्रश्न उठेपछि सिल गरिएको छ । खाद्य प्रविधि तथा गुणस्तर नियन्त्रण डिभिजन कार्यालयले बुधबार कम्पनीको प्रादेशिक गोदाममा रहेको झण्डै दुई हजार क्विन्टल चामल सिल गरेको हो ।
कार्यालयले जिल्ला प्रशासन, प्रहरी प्रतिनिधिका साथै उपभोक्ता अधिकारकर्मीको रोहबरमा नमूना सङ्कलन गरेको छ । डिभिजन कार्यालयका प्रमुख खाद्य निरीक्षक भेषबहादुर थापाले सङ्कलित नमूना प्रयोगशाला पठाइने जानकारी दिए ।
प्रयोगशालाबाट परीक्षण रिपोर्ट नआउञ्जेल कम्पनीलाई उक्त चामल बिक्रीवितरणमा रोक लगाइएको छ । कम्पनीको केन्द्रीय गोदामबाट कर्णाली प्रदेशका लागि पठाएकोमध्ये हाल मौज्दात एक हजार ९७५ क्विन्टल बासमती चामल सिल गरिएको हो ।
सिल गरिएको चालमको प्याकिङ २०७८ वैशाख २२ गते उल्लेख छ । प्याकिङ मितिको दुई वर्षसम्म चामल खानयोग्य मानिन्छ । म्याद गुजे्रको, कुहिएको चामल कर्णाली पठाएको भन्ने चर्चा चलेपछि खाद्य प्रविधि तथा गुणस्तर नियन्त्रण डिभिजन कार्यालय सुर्खेतले बुधबार अनुगमन गरेको हो ।
खाद्य निरीक्षक थापाले यसअघि खाद्य प्रविधि विभागले ‘खान अयोग्य’ भनी सिफारिस गरेको चामल नष्ट गरिएको हो वा होइन भन्नेबारे विभागले नै छानबिन गर्ने बताए । “हामीले नमूना सङ्कलन गरी केन्द्रीय प्रयोगशालामा पठाउने हो, प्रयोगशालाले गुणस्तरबारे रिपोर्ट दिएपछि मात्रै गुणस्तरबारे थाहा हुन्छ”, उनले भने, “यदि विभागले नष्ट गर्नु भनेकै चामल खाद्य कम्पनीले यहाँ पठाएको हो कि होइन छानबिनबाट पनि पत्ता लाग्छ ।” रासस
