अनलाइनबाटै पठाउन सकिन्छ दशैंको उपहार

काठमाडौँ । कोभिड १९ को त्रासका कारण पारिवारिक जमघट गर्दै दसैं मनाउने अवस्था छैन । खासगरी वैदेशिक रोजगारी तथा अध्ययनमा गएकाहरूका लागि परिवारसँग दसैं मनाउन नसक्ने बाध्यता छ । यो अवस्थामा परिवार वा आफन्तलाई चाडपर्वको अवसरमा केही उपहार प्रदान गर्न सकिन्छ । 

त्यसका लागि विदेशबाट सिधै सामान नै पठाइदिनु पर्ने अवस्था अब छैन । विदेशबाटै कम्प्युटरमा गरेको एक क्लिकका भरमा नेपालमा रहेका आफन्तको घरमै उपहार आइपुग्न सक्छ ।

कतिपयका आफन्त यता, आफू विदेशमा वा आफू यता, आफन्त विदेशमा । आफन्तलाई यस्तै तरिकाले भोज ख्वाउने चाहना धेरैको हुन्छ । त्यस्तो भोज रेस्टुराँमै गएर वा घरैमा पनि खान सकिन्छ । त्यस्ता व्यक्तिहरूको चाहना पूरा गरिदिने मध्यस्थकर्ताको काम उक्त वेबसाइटले गरिरहेको छ । यद्यपि यसरी मध्यस्थ बनिदिएबापत छुट्टै शुल्क तिर्नु पर्दैन । रेस्टुराँकै मूल्यमा ती सबै कुरा उपलब्ध हुन्छन् ।

मुन्चा डटकम नेपालमा अनलाइन सपिङको सुरुवात गर्ने पहिलो अनलाइन हो । यसले खासगरी विदेशबाट अर्डर गरिएका विभिन्न सामग्री नेपाली ग्राहकको घरघरसम्म पुर्‍याइदिने काम गर्छ । अन्य अवसरमा नै बढी भीड हुने यो साइटमा दसैंतिहारजस्ता चाडपर्वका अवसरमा त अझ बढी भीड हुन्छ । आफ्नो लोकप्रियताकै कारण मुन्चा डट कमले नेपालका विभिन्न सहरमा समेत शाखा विस्तार गरिसकेको छ ।

हरिलो डट कम त्यस्तै अर्को अनलाइन सपिङ साइट हो । यो साइटले विदेशी सामानहरू किन्न सकिने व्यवस्था गरेको छ । विश्वका प्रमुख देशका उत्पादन उक्त साइटमार्फत किन्न सकिन्छ । यो साइट विशेषगरी ग्याजेट्स खरिदका लागि लोकप्रिय छ । यसको सहयोगले इबे, अमेजन आदि प्रतिष्ठित कम्पनीका साइट मार्फत पनि सामान खरिद गर्न सकिन्छ ।

भाटभटेनी सुपर स्टोरमा उपलब्ध सामग्रीले अहिले काठमाडौंमा निकै लोकप्रियता पाएका छन् । ती सामानलाई अनलाइन पनि खरिद गर्न र उपहारका रूपमा पठाउन सकिन्छ । भाटभटेनी अनलाइन यसको सपिङ साइट हो । नेपालमा सपिङ कम्प्लेक्सले दिएको यो पहिलो सुविधा हो ।

ठमेल डटकमलाई पनि अनलाइन सपिङको अग्रणी साइट मानिन्छ । सन् २००० मै प्रारम्भ भएको उक्त साइटमा विभिन्न गिफ्ट पठाउन एवं खरिद गर्न सकिन्छ ।

अर्को साइट फुडमान्डु डट कम भने पहिलेदेखि नै प्रचलित छ । उपयुक्त समयमा सेवा उपलब्ध गराउने प्रयोजनका लागि फोन गरेर वा यो साइटमा लग इन गरेर फारम भरेपछि आफ्नो रुचिअनुसारको खाना उपलब्ध गराउने काम फुडमान्डु डटकमले गर्छ । फुडमान्डुको वेबसाइटमा काठमाडौंको रिङ रोडभित्रका ८० भन्दा बढी रेस्टुराँका मेनु फेला पार्न सकिन्छ । ग्राहकले आफूलाई पायक पर्ने अथवा आफुले रोजेको रेस्टुराँको खाना अनलाइन रुपमै अर्डर गर्न सक्छन् ।

फुडमान्डुमार्फत आफ्नो बजेट अनुसारको खाना अर्डर गरेर आफन्तलाई उपहार दिन सकिन्छ । यसका लागि सहरका विभिन्न स्थानमा सवारी साधनसहित डेलिभरी पर्सनको व्यवस्था गरिएको छ । 

अनलाइन रूपमा खाना अर्डर गर्नेहरूको संख्या बढ्दै गएको छ । प्रविधिसँग सुमधुर सम्बन्ध राख्ने युवापुस्ताले यस्ता कार्यमा विशेष चासो राख्छ । पछिल्लो समयमा यसको दायरा फराकिलो बन्दै गएको छ । त्यसबाहेक नेपाली बजारमा नेपवे डटकम, रोजेको डटकम, एस कान्तिपुर आदि वेबसाइट पनि सक्रिय छन् । पछिल्लो समयमा यस्ता साइटको लोकप्रियता बढ्दो छ, जसका कारण दसैंतिहारजस्ता चाडपर्वलाई पनि उल्लासमय बनाउन सहयोग पुगेको छ ।