बार्सिलोनाले जित्दा रियल म्याड्रिड बराबरीमा रोकियो

एजेन्सी/म्याड्रिड । स्पेनिस ला लिगामा बार्सिलोनाले जित निकाल्दा उपाधि दौडमा रहेको रियल म्याड्रिड बराबरीमा रोकिएको छ ।

आइतबार राति भएको खेलमा बार्सिलोनाले डिपोर्टिभो अलाभेसलाई उसैको मैदानमा १–० गोलले हरायो । घरेलु मैदानमा रियल म्याड्रिड इल्चेसँग २–२ गोलको बराबरीमा रोकियो ।

घरेलु टोलीलाई दबाबदिँदै ७६ प्रतिशत बल पोसेसन राखेपनि बार्सिलोनालाई गोल गर्न निकै संघर्ष गर्नुपरेको थियो । यता खेलभर रक्षात्मक रणनिति अपनाएको अलाभेस अन्तिममा सम्हालिन नसक्दा हार खेप्न बाध्य बन्यो ।

इन्जुरी समयमा जोस मेनडिलीबार सोझै रातो कार्ड पाउँदै बाहिरिएपछि अलाभेसले १० खेलाडीमा खेल सकेको थियो । बार्सिलोनाका पेड्री ‘म्यान अफ दिन म्याच’ भए । जितसँगै बार्सिलोना पाँचौं स्थानमा उक्लिएको छ । बार्सिलोनाले २१ खेलबाट ३५ अंक बनाएको छ । पराजित अलाभेस १७ अंक सहित १९औं स्थानमा छ ।

यसैगरी अर्को खेलमा शीर्षटोली रियलले दुई गोलले पछि परेर पनि बराबरी गोल फर्कायो । प्रतिस्पर्धात्मक खेलमा इल्चेका लुकास बोयले ४२औं र पेरे मिल्लाले ७६औं मिनेटमा गोल गरेका थिए । यसअघि ३३औं मिनेटमा रियलका कप्तान करिम बेन्जेमा पेनाल्टीमा चुक्दा रियलले दबाब झेलेको थियो ।

अलाभेसको दुई गोलपछि जोसिएको रियलले ८२औं मिनेटमा पहिलो गोल फर्कायो । लुका मोड्रिचले पेनाल्टीमा गोल गर्दै रियललाई खेलमा फर्काउने प्रयास गरे । इन्जुरी समयमा इडर मिलिटाओले गोल गर्दै रियललाई हारबाट जोगाए । ६५ प्रतिशत बल पोसेसन राखेपनि रियललाई खेलमा फर्कन निकै संघर्ष गर्नुपरेको थियो ।

रियलका इडर मिलिटाओ ‘म्यान अफ दिन म्याच’ भए । बराबरीसँगै शीर्षस्थानमा रहेको रियलले २२ खेलबाट ५० अंक बनाएको छ । दोस्रो स्थानमा रहेको सेभियाको ४६ अंक छ । रियललाई रोकेको इल्चे २३ अंक सहित १५औं स्थानमा छ ।

आइतबार रातिनै भएको अन्य खेलमा एथलेटिक बिल्बाओले रायो भालेकानोलाई १–० र ओसासुनाले ग्रानाडालाई २–० गोलले पराजित गरेको छ । रियल सोसिडाड र गेटाफेले गोलरहित बराबरी खेल्दै अंक बाँडेको छ ।

विश्वकै चर्चित लिग मध्यको एक स्पेनिस ला लिगा फुटबल पहिलो पटक नेपालमा डिशहोम एक्सन स्पोर्ट्स एचडी टेलिभिजन मार्फत प्रतक्ष हेर्न पाइने ब्यवस्था छ । हरेक हप्ता आउने ला लिगाको खेल अब हप्ताको ५० रुपैयाँ शुल्क तिरेर हेर्न सकिने छ ।

ला लिगाको नेपालका लागि पे टिभी तथा डिजिटलको विशेष प्रसारणको अधिकार डिशहोमले प्राप्त गरेको हो । ला लिगाका खेलहरु एक्सन स्पोर्टस एचडी २ मा प्रशारण भईरहेको छ ।

त्यसका लागि डिशहोमको ग्राहक भने बन्नुपर्ने हुन्छ । हाल डिशहोमको ग्राहकलाई ला लिगाको सिजन टिकट सिम टिभी, प्रभु टिभी र डिश होमको ओटीटी (डिशहोम गो) मार्फत उपलब्ध छ ।