बिहीबार १३ बैशाख, २०८१ | Thursday Apr 25, 2024
काठमाडौं । एसाप इन्टरटेनमेन्ट नेपाल र अष्ट्रेलियास्थित कम्पनी मिलेर डलर एयूडी नामक फिल्म बनाउने भएका छन् । बिहीबार राजधानीमा आयोजित एक प्रेस भेटघाटमा उक्त फिल्म बनाउने घोषणा गरिएको हो ।
कार्यकारी निर्माता सन्तोष अधिकारी र निर्देशक देवकुमार श्रेष्ठ रहने उक्त फिल्मले अष्ट्रेलियामा पढाई वा कामको सिलसिलामा बसोबास गर्दै आएका नेपालीहरुको समस्यामाथि प्रकाश पार्ने जनाइएको छ ।
फिल्मको मुख्य उद्देश्य नेपाली र नेपालको परम्परालाई अन्तर्राष्ट्रिय जगतमा चिनाउनु रहेको भन्दै फिल्म निर्माता पक्षले पूरै अष्ट्रेलियामा नै फिल्म सुटिङ हुने बताएको छ ।
फिल्मका सहनिर्माता अन्जना अधिकारी, अरुण श्रेष्ठ र तृष्णा गुरुङलगायत छन् भने फिल्म अमैरा प्रोडक्सन्सको ब्यानरमा बन्न लागेको हो । फिल्मको सुटिङ भने आगामी जुलाईको मध्यदेखि सुरु गर्ने जनाइएको छ ।
