नेपालमा पहिलो पटक टोस्टमास्टर्स डिस्ट्रिक्टको तालिम

काठमाडौं । टोस्टमास्टर्स इन्टरनेशनल डिस्ट्रिक्ट ४१ ले नेपालमा पहिलो पटक डिस्ट्रिक्ट अफिसर तालिम कार्यक्रम आयोजना गरेको छ । टोस्टमास्टर्सले यही साउन ६, ७ र ८ मा आयोजना गरेको तीन दिने कार्यक्रममा भारत र नेपालका ९० जनाभन्दा बढी डिस्ट्रिक्ट अफिसरहरु सहभागी थिए । 

एक गैर–नाफामुखी शैक्षिक संस्था टोस्टमास्टर्स इन्टरनेशनलले विश्वव्यापी नेटवर्कमार्फत सार्वजनिक बोल्ने र नेतृत्व कौशल सिकाउने काम गर्दै आएको छ । अमेरिकामा सन् १९२४ देखि शुरु भएको टोस्टमास्टर्स इन्टरनेशनल हाल विश्वका १४९ राष्ट्रमा फैलिएको छ । नेपालमा यो संस्था सर्वप्रथम सन् १९९१ मा शुरु भएको हो । 

सोही उत्प्रेरणालाई निरन्तरता दिँदै पूर्व डिस्ट्रिक डाइरेक्टर डि.टि.एम.रन्जित आचार्यले नेतृत्व वर्गलाई सम्बोधन गर्दै नेता हुनु भनेको सबैभन्दा उत्कृष्ट हुनु नभएर हिजोको आफूभन्दा आजको आफू सुधारिनु भएको धारणा व्यक्त गरेका थिए । प्रत्येकको प्रतिस्पर्धा अरु कोही नभएर स्वयम् आफ्नै विगत भएको र सफल हुनको लागि आफैमा जिम्मेवारबोध, चनाखो हुनुपर्ने बताउँदै उनले भने, ‘मान्छेले सधैँ केही न केही गरिरहनु पर्यो र आफूले जे गरेको छ त्यसमा रमाउन सक्नु पर्यो ।’

तालिम समारोहमा नेपाली चलचित्र क्षेत्रका चर्चित कलाकार तथा बलिउडमा पनि आफ्नो प्रभुत्व जमाउन सफल प्रतिष्ठित कलाकार सुनिल थापाले प्रमुख अतिथिका रूपमा तालिमकर्तालाई सम्बोधन गरेका थिए । टोस्टमास्टर्स समुदायले समयप्रति देखाएको प्रतिबद्धता, व्यवस्थापन र व्यावसायिकताको प्रशंसा गर्दै उनले यो सिप व्यक्तिगत र व्यवसायिक जीवनमा पनि लागू गर्न सके धेरै प्रगती गर्न सकिने बताएका थिए । ​डिस्ट्रिक्ट ४१ का प्रोग्राम क्वालिटी डिरेक्टर तथा कार्यक्रमका अध्यक्ष डि.टि.एम.सुमन शाक्यले कोभिडपछिको नौलो समयलाई इङ्गित गर्दै भने, ‘हामी टोस्टमास्टर्सहरुले एक कुशल नेतृत्वको रुपमा नयाँनयाँ चुनौतीहरुलाई सामना गर्न सिक्नु पर्छ र यसको मन्त्र भनेको राइज रिबिल्ड र रिभाइभ हो ।’

डिस्ट्रिक्ट ४१ का डि.टि.एम.क्लब ग्रोथ डिरेक्टर मुनप्रधान र उनको समूहले तालिम कार्यक्रमको नेतृत्व गरेका थिए । तालिममा टोस्टमास्टर्सको बजार प्रवद्र्धन गर्न, नयाँ क्लबहरू खोल्ने बिषयलाई समेत प्राथमिकता दिइएको थियो । तालिम कार्यक्रम अन्तरकृयात्मक हुनुको साथै डिस्ट्रिक्ट ४१ का  नवनिर्वाचित डिस्ट्रिक्ट अफिसरहरुको लागि अत्यन्तै जानकारीमूलक रहेको सहभागीहरुले बताएका छन् । तालिममा भारतबाट आएका ६२ जना सहभागीले पनि नेपालीहरूको आतिथ्यको खुलेरै प्रशंसा गरेका थिए ।