प्राधिकरणका प्रदेश कार्यालयले समेत कागजाज मागेर हैरान पारेः कम्पनीहरु, दुःख नमान्नु: सिलवाल

काठमाडौं । पछिल्लो समय नेपाल बीमा प्राधिकरणका प्रदेश कार्यालयहरु थपिने क्रम जारी छ । प्राधिकरणका प्रदेश कार्यालयहरु थपिँदा त्यसको सास्ती भने बीमा कम्पनीहरुले खेप्नुपरेको छ । 

प्राधिकरणको केन्द्रीय र प्रदेश कार्यालयहरुबीच तालमेल नहुँदा हरेक कार्यालयले बीमा कम्पनीहरुसँग विवरण माग्ने र कागजाज मागेर हैरान पार्न थालेका छन् । कर्पोरेट नेपालसँग एक पूरानो तथा ठूलो जीवन बीमा कम्पनीका प्रमुख कार्यकारी अधिकृत (सीईओ)ले भने, ‘प्राधिकरणले शाखा खोल्नुमा हाम्रो कुनै आपत्ति होइन । खोलोस । तर, प्राधिकरणको प्रदेश कार्यालय र केन्द्रीय कार्यालयबीच तालमेल नै भएन् । एउटै कागजाज प्रदेश कार्यालयहरुले पनि मागेको छ । केन्द्रले पनि मागेको छ । त्यही कुरा हाम्रो प्रदेशको कार्यालयसँग पनि मागेको छ । यहाँको कर्पोरेट अफिससँग पनि मागेको छ । 

प्राधिकरणका स्थानीय कार्यालयहरुले बीमा कम्पनीका प्रदेश कार्यालयहरुसँग विवरण माग्दा धेरैजसो कुरा केन्द्रमा सोधेर मात्रै दिने भएकाले पनि दोहोरो, तेहेरोपन भएको बताउँदै ती सीईओले प्राधिकरणले दुःख दिनेभन्दा पनि आफ्नो कामकारवाहीलाई चुस्त र प्रभावकारी बनाइदिए आफूहरुलाई पनि सहज हुने बताए । 

यता बीमा प्राधिकरणका अध्यक्ष सूर्य सिलवालले भने आफूहरुको प्रदेश कार्यालय कम्पनीहरुलाई दुःख दिनको लागि नभई सहजता ल्याउन स्थापना गरेको तर्क गरे । उनले भने, ‘हामीले प्राधिकरणको कार्यालय कुनै पनि कम्पनीहरुलाई दुःख दिन खोलेका होइनौं । यसमा कसैले पनि दुःख नमान्नुहोला । तर, यसमा के हुनसक्छ भने कम्पनीहरुको मोफसलमा रहेको प्रदेश कार्यालयमा पनि सबै कागजात नहुनसक्छ । त्यस्तो अवस्थामा कम्पनीको मुख्य कार्यालयमार्फत नै काम लिनुपर्ने हुन्छ । यसले कहिलेकाहीं दोहोरोपन देखिएको हुनसक्छ । हामीलाई यसलाई सुधार गर्दै लैजान्छौं ।’ 

नजिकको कार्यालयले नजिकको कार्यालयमा भन्न सहज हुने र त्यसको जानकारी प्राधिकरणमा बस्ने सिलवालले बताए । उनले प्राधिकरणले कागजाजको सट्टा वेभसाइटमा विवरण अद्यावधिक गर्न थालेको अवस्थामा कम्पनीहरुसँग कागजपत्र माग्ने अवस्था पनि कम भएर जाने बताए ।