बिहीबार ६ बैशाख, २०८१ | Thursday Apr 18, 2024
काठमाडौं । उद्योग, वाणिज्य तथा आपूर्ति मन्त्री दामोदर भण्डारीको पद गएपछि २ लिमिटेडको महाप्रबन्धक नियुक्ति स्थगित भएको छ ।
मन्त्रालयले औद्योगिक क्षेत्र व्यवस्थापन लिमिटेड र नेपाल औषधि लिमिटेडको महाप्रबन्धक नियुक्ति प्रकृया स्थगित गरेको हो ।
मन्त्रालय अन्तर्गतको २ निकायमा मन्त्री भन्डारीले नयाँ महाप्रबन्धक नियुक्ति गर्न खोजेका थिए। तर मन्त्री भण्डारीको आफ्नै पद नरहेपछि उद्योग सचिव तोयानारायण ज्ञवालीले छनोट प्रकृया स्थगित गरेका हुन् ।
औषधि लिमिटेडले सिटामोल, पेन किलर, जिवनजल जस्ता औषधि उत्पादन गर्दै आएको छ। लिमिटेडमा २ वर्ष महाप्रबन्धकका रुपमा मोहम्मद साफिल्ह रहेका थिए ।
तर उनले थप एक वर्ष निरन्तरताका लागि पहल गर्दै आएका थिए। मोहम्मद र उदयपुर सिमेन्ट उद्योगको महाप्रबन्धक गोपी कृष्ण न्यौपानेले एकै पटक नियुक्ति पाएका थिए। न्यौपानेको कार्यकाल मन्त्रालले १ वर्ष थप गरेपछि मोहम्मदले पनि एक वर्ष निरन्तरता हुनुपर्ने माग राखेका थिए। तर सो माग पुरा हुन सकेन। यस विषयमा सर्वोच्च अदालतमा पनि मुद्दा परेको छ ।
अदालतले मन्त्रालयलाई भएको के हो भनि पत्राचार गरेपछि प्रकृया नै रोकेको हो। यस्तै औद्योगिक क्षेत्र व्यावस्थापन लिमिटेडले देशभर रहेका औद्योगिक क्षेत्रको नियमन विकास विस्तार गर्दै आएको छ ।
महाप्रबन्धक सिफारिसका लागि गठित छनौट तथा सिफारिस समितिले गोरखापत्र दैनिकमा मिति फागुन १ गते २१ दिने सूचना प्रकाशन गरी पदपूर्ति प्रक्रिया अघि बढाइएको थियो ।
