काठमाडौं । नेपाल राष्ट्र बैंकले भाखा नाघेको कर्जाको ६ महिनापछि मात्रै धितो लिलामी गर्न पाउने व्यवस्था रहेको सुझाएको छ ।
राष्ट्र बैंक वित्तीय समावेशिता तथा ग्राहक संरक्षण महाशाखाले आज सूचना प्रकाशित गरी बैंक तथा वित्तीय संस्थाहरुका लागि उक्त व्यवस्था सुझाएको हो ।
कर्जा लिंदाका बखत तोकिएको शर्त बमोजिक कर्जा भुक्तानी गर्नु ऋणीको कानूनी दायित्व हो । बैंक तथा वित्तीय संस्थाले प्रदान गर्ने एक वर्षभन्दा बढी अवधिको कर्जा तोकिएको समयमा असुल नभएमा असुलीको लागि सार्वजनिक सूचना तथा धितो लिलामीको कारबाही शुरु गर्दा भाखा नाघेको कम्पनीमा ६ महिना भई उक्त कर्जा शंकास्पद वर्गमा वर्गीकरण भएको हुनु पर्ने व्यवस्था गरिएको राष्ट्र बैंकद्वारा प्रकाशित सूचनामा उल्लेख छ ।
बैंक तथा वित्तीय संस्थाले राष्ट्र बैंकले तय गरेको व्यवस्थाको पालना नगरेमा ऋण लिएको संस्थाको वेबसाइटमा उपलब्ध गराइएको गुनासो सुन्ने अधिकारीसमक्ष गुनासो दर्ता गर्न सुझाएको छ ।
उक्त सम्बन्धित संस्थाबाट गुनासो सुनुवाइ नभएमा राष्ट्र बैंकमा रहेको वित्तीय ग्राहक संरक्षण इकाइमा गुनासो दर्ता गर्न अनुरोध गरिएको छ ।