काठमाडौं। ई–सेवाको माउ कम्पनी एफवान सफ्ट इन्टरनेश्नल प्रा.लि. उत्कृष्ट १० कम्पनीको सूचीमा परेको छ । नेपाल आयल निगम, धेरै कारोबार गर्ने केही वाणिज्य बैंक र अरु केही कम्पनीपछि एफवान सफ्ट धेरै कारोबार गर्ने नवौं स्थानमा परेको हो ।
कर्पोरेट नेपाललाई प्राप्त विवरणअनुसार चालु आर्थिक वर्षको पहिलो ६ महिना (पुससम्म)मा उसले सात अर्ब दुई करोड ९५ लाख रुपियाँको व्यापार गरेको छ । कम्पनीले गत आर्थिक वर्षमा १५ अर्ब ६६ करोड रुपियाँ कारोबार गर्दै १३औं स्थानमा परेको थियो । अहिले ६ महिनाको व्यापार हेर्दा एफवान सफ्ट ‘टप टेन’ (उत्कृष्ट दश)मा पर्ने संभावना बढेको छ । यद्यपि पछिल्लो ६ महिनामा उसले कति व्यापार गर्छ ? त्यसमा उसको स्थान निर्धारण हुनेछ ।
उसका कतिपय कारोबार विवादित र शंकास्पद भए पनि कम्पनीको कारोबारमा उछाल आएको छ भने लगानीकर्ताहरु मालामाल भएका छन् । प्रविधि तथा वित्तीय कारोबारका क्षेत्रमा आक्रामकरुपमा आएको र अर्बपति क्लबमा पर्न सफल एफवान सफ्टको सञ्चालकमा विश्वास ढकाल, अस्गर अली, संभव सिरोहिया, सुवास सापकोटा लगायत छन् ।
अवैध बेटिङ (अनलाइनबाट खेलिने जुवा) कारोबारमा समेत संलग्न रही ठूलो आम्दानी गर्दै आएको एफवान सफ्टको विद्युतीय भुक्तानी सेवा प्रदायक कम्पनी ई–सेवाको २० प्रतिशत शेयर र उक्त कम्पनीको व्यवस्थापन एक नाम चलेको मिडियाका सञ्चालकलाई दिएर सरकारले गर्नसक्ने संभावित छानविन र कारवाहीबाट आफूलाई सुरक्षित गर्दै आएको छ ।
एफवान सफ्टको कारोबार शंकास्पद देखिएको भन्दै हालै ठूला करदाता कार्यालयले उसको वित्तीय विवरणको ‘फुल अडिट’ सुरु गरेको छ । एफवान सफ्टअन्तर्गतका विभिन्न कम्पनीमध्ये फोन पे र ई–सेवा अधिक कारोबार गर्ने कम्पनीमा पर्छन् । ई–सेवाले अवैध बेटिङ कम्पनी वान एक्स बेटिङसँग सहकार्य गरी आफ्नो सूचना बिक्री गर्दै आएको छ । उक्त कारोबारबाट नै ई–सेवा र एफवान सफ्टको कारोबारमा उछाल आएको हुनसक्ने आंकलन गरिएको छ।
उन्नाइस वर्ष अगाडी स्थापना भएको यो कम्पनीले नेपालको डिजिटल प्रविधि र वित्तीय कारोबारको क्षेत्रमा महत्वपूर्ण हिस्सा ओगट्न सफल भएको छ । एफवान सफ्टको अध्यक्षमा विश्वास ढकाल छन् । उनी पछिल्लो समय सिंगापुरमा बसेर नेपालको ब्यापार निगरानी गर्ने र ठूलठूला डिल सिंगापुरमा नै गर्दै आएका छन् ।
बढ्दो प्रविधिको प्रयोग र विद्युतीय भुक्तानी सेवातर्फ जानुपर्ने मानिसहरुको बाध्यताले गर्दा एफवान सफ्ट र ई–सेवाको व्यापार अझै बढेर जाने देखिन्छ । सरकारले प्रविधि निर्यातमा अनुदान दिने घोषणा पनि गरेको छ । यसले एफवान सफ्टलाई थप लाभान्वित बनाउने छ ।
एफवान सफ्टका सहायक कम्पनीहरु नौ वटा छन्, जसमा ई–सेवा, फोन–पे, कोग्नेथ हेल्थ, दियालो टेक्नोलोजी, दर्शन टेक, ई–सेवा मनि ट्रान्सफर, एक्सटेन्सो डाटा, लोजिका बिन्स, स्वस्तिक कलेज छन् । पहिलो डिजिटल वालेट ई–सेवासँग पछि आएका कम्पनीहरुलाई प्रतिस्पर्धा गर्न मुस्किल भइरहेको छ ।
विद्युतीय भुक्तानी क्षेत्रको ठूलो बजार उसले ओगट्दै आएको छ । ई–सेवा एपको सक्रिय प्रयोगकर्ता ५० लाखभन्दा बढी रहेको बताइन्छ ।
यसैगरी, कम्पनीको अर्को लोकप्रिय प्रोडक्ट फोन–पे हो। क्युआर भुक्तानीका क्षेत्रमा यो प्रोडक्टले ठूलो बजार लिँदै आएको छ । फोन–पे सन् २००४ देखि सञ्चालनमा आएको हो । यो कम्पनीले ५८ भन्दा बढी कम्पनीसँग सम्झौता गरेको जनाएको छ भने आफ्नो एप्लिकेशन पाँच लाखभन्दा बढीले डाउनलोड गरेको जनाएको छ ।
एफवान सफ्टले लोजिका बिन्स कम्पनीबाट सफ्टवयर डेभलपमेन्टको काम गर्दै आएको छ । लोजिकाले सफ्टवयर निर्माणको काम गर्दै आएको छ । कर्पोरेट सेक्टर, बैंकिङ क्षेत्र, उद्योग, होटल, ट्राभल एण्ड टुर्स कम्पनीले आफ्नो प्रोफाइल देखाउन र अनलाइन सेवा दिन एफवान सफ्टमार्फत वेभसाइट तथा एप्लिकेशन निर्माणको काम गर्दै आएको छ ।
दर्शनटेक, एफवान सफ्ट ग्रुपले सन् २०१० मा स्थापना गरेको कम्पनी हो । यो कम्पनीले अनलाइन डोमिनको इन्सुरेन्सको काम गर्दै आएको छ । सात वटा इन्सोरेन्स कम्पनीसँग सम्झौता गरी उसले व्यापार गर्दैआएको छ ।
यसैगरी, एफवान सफ्टले ई–सेवा मनी ट्रान्सफर सेवा पनि सुरु गरेको छ । कम्पनीले ई–सेवामार्फत विदेशबाट नेपालमा रकम पठाउन यो कम्पनी स्थापना गरेको हो । यस्तै, एक्सटेन्सो डाटाले विभिन्न बिजनेस हाउसको तथ्यांकहरु केलाएर व्यापार बढाउने उपाय दिनेछ। ग्रुपले २०१३ देखि आईटी कलेज पनि सञ्चालन गर्दै आएको छ । स्वस्तिक कलेज स्थापना गरी कम्युटर साइन्स तथा प्रविधिमा दक्ष जनशक्ति निकाल्ने उसको लक्ष्य छ ।
यो पनि पढ्नुहोस्:
ई–सेवाको माउ कम्पनी एफवान सफ्टको फाइल ‘फुल अडिट’मा, कारोबार शंकास्पद
ईसेवा, खल्ती जस्ता वालेटहरु अवैध अनलाइन जुवा कारोबारमा संलग्न रहेको खुलासा (प्रमाणसहित)