मेलम्चीको पानी १० दिन बन्द हुने, मेलम्चीको पानीबाट सोचेजस्तो आम्दानी भएन्ः राई

काठमाडौं । आगामी जेठ ५ गतेदेखि १५ गतेसम्म १० दिन मेलम्ची खानेपानी आयोजनाले मेलम्ची सुरुङबाट पानी पथान्तरण बन्द गर्ने भएको छ । सोमवार पत्रकार सम्मेलन गर्दै काठमाडौं उपत्यका खानेपानी लिमिटेडले मेलम्ची सुरुङबाट हुने पानी पथान्तरण १० दिन बन्द हुने जानकारी दिएको हो । 

कम्पनीका प्रवक्ता प्रकाशकुमार राईले मेलम्ची खानेपानी विकास समितिले आयोजनाको अम्बाथान स्थिति हेडवक्समा गेट नम्बर १ र ९ तथा अडिट सुरुङमा मेकानिकल पार्टको जडान लगायत संरचनाहरुको निर्माण तथा सुधार कार्य गर्न लागेकाले सुरुङ बन्द गर्न लागेको बताए । 

उनले सुरुङबाट पानी पथान्तरण बन्द हुने भएसँगै काठमाडौं उपत्यका खानेपानी वितरणको तालिका पानी वितरणको दिन अवधिको अन्तर बढाएर हेरफेर गरिएको बताए । राईले खानेपानी वितरणको तालिका काठमाडौं उपत्यका खानेपानीको वेबसाइट र शाखा कार्यालयहरुको फेसबुक पेजमार्फत प्रकाशन गरिएको बताए । उनले २०७९ साल मंसिरदेखि आजसम्म मेलम्ची खानेपानी आयोजनाबाट भइरहेको निरन्तर पानी आपूर्तिले काठमाडौंबासीको मुहारमा देखिएको सन्तुष्टि र खुशीलाई दिगो र बाह्रै महिना कायम राख्ने प्रयास रहने बताए । 

राईले भने, ‘वर्षा याममा हुनसक्ने सम्भवित प्रकृतिक प्रकोप कारण आयोजनामा थप क्षति हुन नदिन विषम परिस्थिति बाहेक १२ महिना पानी सञ्चालन गर्ने उदेश्यले मेलम्ची खानेपानी विकास समितिले आयोजनाको अम्बाथान स्थिति हेडवक्समा गेट नम्बर १ र ९ तथा अडिट सुरुङमा मेकानिकल पार्टको जडान लगायत संरचनाहरुको निर्माण तथा सुधार कार्य गर्न २०८० जेठ ५ देखि १५ गतेसम्म १० दिनका लागि आयोजनाको मेलम्ची सुरुङ बन्द गर्न लागिएको छ । उक्त कार्य सम्पन्न भएपश्चात यो वर्षको वर्षायाममा पनि आयोजनाको प्रतिकुल अवस्थामा बाहेक अन्य अवस्थामा सुरुङबाट पानी पठाउने कुरामा आशावादी रहेको छ । सोही बमोजिम काठमाडौं उपत्यका खानेपानी वितरणको तालिका हेरफेर गरीएको छ । पानी वितरणमा हुने अवधिको अन्तर बढाइएको छ । खानेपानी वितरणको तालिका काठमाडौं उपत्यका खानेपानीको वेबसाइट र शाखा कार्यालयहरुको फेसबुक पेजमार्फत प्रकाशन गरिएको छ । २०७९ साल मंसिरदेखि आजसम्म मेलम्ची खानेपानी आयोजनाबाट भइरहेको निरन्तर पानी आपूर्तिले काठमाडौंबासीको मुहारमा देखिएको सन्तुष्टि र खुशीलाई दीगो र बाह्रै महिना कायम राख्ने प्रयास रहनेछ । आयोजनामा हुने निर्माण,जडान तथा सुधारका कार्यहरु गर्न केही दिनका लागि पानी पथान्तरण बन्द हुने अवस्थाबाट आम उपभोक्तामा पर्न जाने असुविधाप्रति क्षमाप्रार्थी छौं ।’

प्रवक्ता राईले मेलम्चीको १७ करोड लिटर पानी आउँदा १७ करोड रुपियाँ उठ्नुपर्ने मान्यता भएपनि १० हजार लिटर बराबर एक सय रुपियाँसम्म उठ्ने गरेको बताए । उनले विगतमा ५ हजार लिटर पानी आउँदा पनि सय रुपियाँ संकलन भएको १७ करोड लिटर पानी अनुसार आम्दानी नदेखिएको बताए । राईले मेलम्चीको १७ करोड लिटर पानी आएपश्चात वार्षिक आयमा १० करोड रुपियाँले वृद्धि भएको बताए । उनले मेलम्ची आउनुभन्दा पहिला वार्षिक ६५ करोड रुपियाँ हुने गरेकोमा मेलम्ची आएपछि ७५ करोड पुग्ने अवस्था रहेको बताए । 

राईले मेलम्चीसहित १८ करोड लिटर पानी धाराहरुमा वितरण गरिएको भन्दै मेलम्चीको पानी रोकिएपछि आठ करोड मात्रै पानी वितरण हुने बताए । उनले पानी तीनदेखि १० दिनको अन्तरालमा वितरण गर्ने बताए ।