बुधबार १२ बैशाख, २०८१ | Wednesday Apr 24, 2024
काठमाडौं । प्रधानमन्त्री एवं नेकपा माओवादी केन्द्रका अध्यक्ष पुष्पकमल दाहालले भ्रष्टाचारविरुद्ध लागेका कारण आफू मारिनसक्ने बताएका छन् ।
आफ्नो पत्रकार निकट संगठनको कार्यक्रममा शनिबार उनले जनयुद्ध जस्तै भ्रष्टाचारविरुद्धको लडाइँमा आफू हामफालेको तर्क गरे ।
यो (भ्रष्टाचार) लडाइँ पनि जनयुद्ध जस्तै कतिबेला घेराबन्दीमा परिने हो ? कतिबेला दुश्मनबाट मारिने हो ? भन्ने ठेगान नभएको दाहालले बताए ।
उनले भने, ‘बेथिति, विकृतिको विरुद्ध, भ्रष्टाचारको विरुद्धको लडाइँमा जनयुद्धको बेलामा जस्तै हाम फालेको अनुभव हुन्छ । जनयुद्धको बेलामा कतिबेला मारिन्छ भन्ने थाहा थिएन ? अहिलेको लडाइँ पनि त्यस्तै त्यस्तै छ । कतिबेला घेरामा परिने हो ? मारिने हो ? दुश्मनको घातप्रतिघातमा परिने हो ? ठेगान छैन ।’
दाहाल अब भ्रष्टाचार र वेथितिविरुद्धको आन्दालेनमा पनि जनताले साथ दिने दाबी गरे । उनले केही समयभित्रै अझ ठूलठूला एक्सनहरु हुनेसमेत बताए । त्यो एक्सनले पार्ने तरंग पनि ठूलठूलो हुने उनको भनाइ छ । अब भ्रष्टाचारविरुद्ध एक्सन लिनुको विकल्प नभएको दाहालले बताए ।
उनले थपे, ‘अहिले नदेखिएको मात्रै हो । केही समयभित्रै ठूलाठूला एक्सन हुनेछन् । त्यसले ल्याउने तरंग पनि ठूलै हुनेछ र सबैको साथ जनयुद्धमा जस्तै पाउनेछौं ।’
