‘त्रिभुवन विमानस्थल कात्तिक २३ देखि पाँच महिना राति १० बजेदेखि ८ बजेसम्म बन्द हुन्छ’

Advertisement

काठमाडौं । नेपाल नागरिक उड्डयन प्राधिकरणका महानिर्देशक प्रदीप अधिकारीले गौतमबुद्ध अन्तर्राष्ट्रिय विमानस्थल सञ्चालनको लागि निजी क्षेत्रको सक्रियता आवश्यक रहेको बताएका छन् । 

शुक्रवार सार्वजनिक नीति तथा प्रत्यायोजित विधायन समितिको बैठकमा महानिर्देशक अधिकारीले आत्तिनुपर्ने अवस्था नभएको भन्दै विमानस्थल सञ्चालनमा आउने विश्वास व्यक्त गरे । 

Advertisement

गौतमबुद्ध अन्तर्राष्ट्रिय विमानस्थलमा राज्यले गर्नुपर्ने पूर्वाधार निर्माणमा आवश्यक सबै लगानी गरी आवश्यक सरकारी सबै निकायहरुको शाखा बिस्तार भएको बताउँदै उनले अन्तर्राष्ट्रिय उडानको लागि आवश्यक सरकारी सबै कार्यालयहरु श्रम, भिसा, बैंकहरु समेत पुगेको बताए । 

महानिर्देशक अधिकारीले सरकारी भन्दा पनि सबैभन्दा पनि क्षेत्र निजी क्षेत्रको भएको तर निजी क्षेत्रले चासो नदिँदा विमानस्थल चल्न कठिन भएको बताए । उनले विमानस्थल सञ्चालनको लागि सरकारी निकायहरुको कामभन्दा ठूलो क्षेत्र निजी क्षेत्र रहेको र वैदेशिक उडानको लागि म्यानपावर, तालिम केन्द्र, भाषा कक्षाहरु, बीमा, होटल लगायत निजी क्षेत्रले व्यवस्थापन गर्न आवश्यक रहेको उल्लेख गरे । 

नागरिक उड्डयन प्राधिकरणलाई ऐनले दिएको जिम्मेवारी मर्मत, सञ्चालन र अप्रेसनका कुराहरु सबै पूरा भएको बताउँदै अधिकारीले गौतमबुद्ध अन्तर्राष्ट्रिय विमानस्थल सञ्चालनको लागि निजी क्षेत्रको लगानी आवश्यक रहेको बताए । उनले विमानस्थल चल्नको लागि दुई वटा उपायहरु मात्रै रहेको बताए । 

अधिकारीले कोरोना महामारी अघिकै जस्तो अर्थतन्त्र चलायमान भए र ट्राफिक रेगुलेट हुँदा मात्रै तत्कालको लागि चल्नसक्ने बताए । उनले सरकारले श्रमका उडानहरु सबै भैरहवाबाट गर्ने सरकारले निर्णय गर्नसके पनि विमानस्थल चल्ने बताए । अधिकारीले काठमाडौंको त्रिभुवन अन्तर्राष्ट्रिय विमानस्थलको ग्रोथ ९० लाख पुग्न थालेकाले आगामी एक वर्षदेखि धान्नसक्ने अवस्था नहुने बताए । 

उनले त्रिभुवन अन्तर्राष्ट्रिय विमानस्थल निर्माणको लागि आगामी कात्तिक २३ गतेदेखि चैत १८ गतेसम्म करिब पाँच महिना बेलुका १० बजेदेखि ८ बजेसम्म बन्द हुने बताए । अधिकारीले त्यो बेला विकल्प विमानस्थल गौतमबुद्ध हुने बताए । 

उनले भने, ‘भैरहवामा भन्दा तेलको मूल्य कोलकत्तामा सस्तो भएकाले गौतमबुद्ध विमानस्थलमा जहाज ल्याण्ड नगरेर उतै जाने गरेका छन् । भारतकै मूल्यमा आयल निगमले तेल दिनसक्छ कि सक्दैन भन्ने विविध विषयहरु छन् । सरकारको गौतमबुद्ध अन्तर्राष्ट्रिय विमानस्थल बनाउन छ अर्ब ७० करोड मात्रै लागेको हो । पूर्वाधार निर्माणको हिसाबले गौतमबुद्ध अन्तर्राष्ट्रिय विमानस्थलमा लगानी फस्यो भन्नुपर्ने अवस्था छैन ।’ 

अधिकारीले टुइन अटर जहाजको कमीले मुलुकका ५५ विमानस्थल बन्द भएको बताए । उनले नेपाल वायुसेवा निगमको २ र निजी क्षेत्रको ६ वटा जहाजले देशभरका विमानस्थल चलेन भन्नु सान्दर्भिक नभएको बताए । अधिकारीले विमानस्थलहरु सञ्चालनको लागि जहाजहरु थप्नुपर्ने बताए । 

उनले निजी क्षेत्रले जहाज थप्नको लागि सरकारको नीति हेर्नुपर्ने भन्दै हवाई भाडामा समेत कर लगाएको र अहिलेको बजेटमा पनि यथावत राखिएको बताए । उनले सरकारले जहाज खरीद गर्नेहरुलाई छुट दिन आवश्यक रहेको बताए । प्राधिकरणले नाफा–घाटाको कुरा गर्दा ९ वटाबाहेक अन्य सबै विमानस्थल घाटामा रहेकाले ९ बाहेक सबै बन्द गर्नुपर्ने अवस्था आउने अधिकारीले बताए । उनले सरकारले जहाज थप्ने नीति ल्याउन आवश्यक रहेको बताए । 

Advertisement

Advertisement