सात दिनभित्र भाडाका सटर खाली गराउन सामुदायिक विद्यालयलाई बालेनको अल्टिमेटम

Advertisement

काठमाडौं । काठमाडौं महानगरपालिकाले महानगरभित्रका सामुदायिक विद्यालयले भाडामा लगाएका सटरहरु सात दिनभित्र खाली नगरे कारबाही गर्ने चेतावनी दिएको छ । 

सोमवार महानगरपालिकाले मध्ये बानेश्वरस्थित रत्नराज्य माध्यमिक विद्यालय लगायतका सामुदायिक विद्यालयहरुले भाडामा दिएका सटरहरु खाली गर्न निर्देशन दिएको हो । महानगरपालिकाका मेयर बालेन (बालेन्द्र) शाहले महानगरभित्रका विकृति हटाउने, संस्कृति जोगाउने, नगरलाई फरक ढंगबाट विकास गर्ने कामलाई अघि बढाएका छन् । सोही क्रममा सामुदायिक विद्यालय परिसरलाई साँधुरो बनाउँदै विद्यार्थीलाई अध्ययन गर्न र खेल्न ठाउँ नहुने तर सो ठाउँ भाडा लगाएर खाने प्रवृतिलाई उनले निरुत्साहित गर्न लागेका हुन् । 

Advertisement

उक्त अवधिभित्र व्यवसायिक प्रयोजनका सटरहरु खाली नगरे कारबाही प्रक्रिया अघि बढाउने महानगरले जनाएको छ । अनुगमनका क्रममा काठमाडौं महानगरपालिकाका शिक्षा अधिकृत केशव ज्ञवालीले काठमाडौं महानगरपालिका सामुदायिक विद्यालयहरुमा विभिन्न खालका टहरा र सटर बनाएर भाडामा लगाउने र भाडा लिने गरेको बताए । 

महानगरभित्र ३७ वटा विद्यालयले सटर भाडामा दिएको बताउँदै उनले सामुदायिक विद्यालयमा अहिले विद्यार्थीको चाप बढेको र विद्यार्थीहरुलाई कक्षा कोठा साँघुरो भएकाले महानगरपालिकाले विद्यालयको स्थान विद्यार्थीहरुका लागि नै प्रयोजन गर्ने हेतु यो नीति लिएको बताए । 

ज्ञवालीले भने, ‘काठमाडौं महानगरपालिकाको एउटा नीति छ, यो विद्यालयहरुमा विभिन्न खालका टहरा र सटर बनाएर भाडामा लगाउने र त्यो भाडा लिने जुन एउटा चलिरहेको छ, ३७ वटा स्कुलमा त्यस्तो देखिएको छ । अहिले महानगरको नीतिअनुसार त्यो भाडामा लगाएको सटरलाई खालि गर्ने र सामुदायिक विद्यालयमा विद्यार्थीको चाप एकदमै बढ्दो छ । ति कक्षाकोठामा विद्यार्थी खचाखच भएका छन् । उनीहरुको बसाई र खेल्ने ठाउँ व्यवस्थापनको लागि ३७ विद्यालयमा हिजोदेखि क्रमशः बन्द गर्दै हिँडेका छाँै । सात दिनको म्याद दिएका छौँ सामान सार्न । त्यो समयसम्म नसारे अर्को प्रक्रिया अघि बढ्छ । विद्यालयको सम्पती बालबालिकाको अधिकतम हितमा प्रयोग हुनुपर्ने भएकाले सोहीअनुसार अघि बढेको हो ।’

महानगरले आईतवारबाट यस अभियान अघि बढाएको हो । यो अभियानले साँघुरो भएको विद्यालयहरुलाई खेल स्थानको व्यवस्थापन र कक्षा कोठा बिस्तार गर्न सहयोग पुग्ने बताइएको छ । 

Advertisement

Advertisement