बिहीबार १३ बैशाख, २०८१ | Thursday Apr 25, 2024
काठमाडौं । नेपाल बैकर्स संघका नवनिर्वाचित अध्यक्ष सुनिल केसीले ब्याजदरका विषयमा सडक आन्दोलन नगर्न उद्योगी व्यवसायीहरुलाई आग्रह गरेका छन् ।
नेपाल उद्योग परिसंघले नवनिर्वाचित अध्यक्ष एवम् कार्यसमितिलाई बधाईसहित मुलुकको अर्थतन्त्रका विषयमा गरेको छलफल कार्यक्रममा केसीले उक्त आग्रह गरेका हुन् ।
अध्यक्ष केसीले परिसंघले दिएका सुझाव बैंकहरु तथा संघ आफैंले पनि गर्न सक्ने भएकाले कार्यान्वयनमा सहयोग गर्ने बताए । उनले अहिले बैंकहरुको प्रमुख समस्याको रुपमा बढ्दो ननपरफर्मिङ लोन (निष्क्रिय ऋण) रहेको बताए ।
उक्त अवसरमा परिसंघका अध्यक्ष विष्णुकुमार अग्रवालले उच्च ब्याजदरका कारण समग्र मागमा उच्च संकुचन आउँदा उद्योगी व्यवसायीहरुको मनोबल खस्किएको बताए ।
उनले संघको नयाँ कार्यसमितिले निक्षेपको ब्याजदर घटाउने सहमतीका लागि धन्यवाद दिदै कर्जाको ब्याजदर घटाउन भूमिका खेल्न पनि आग्रह गरे । मागमा आएको उच्च संकुचनका कारण साना तथा मझौला व्यवसायीहरुले बैंकलाई कर्जाको किस्ता तिर्न सक्ने अवस्था नभएकाले बिना प्रोभिजन ऋणको पुनःसंरचना, पुनः तालिकिरण गरी सहयोग गर्नुपर्ने बताए ।
उद्योगहरुको प्रबर्द्धन गर्न वेसरेटमा २ प्रतिशत मात्रै ब्याज लगाएर कर्जा प्रवाह गर्न पनि आग्रह गरे । अध्यक्ष अग्रवालले चालुपूँजी कर्जा मार्गदर्शनको संशोधनपछि पनि राष्ट्र बैंक, बैंकर, उद्योगी व्यवसायीबीच बुझाईमा एकरुपता आउन नसकिरहेकाले विज्ञसहितको हेल्प डेस्क स्थापना तथा तत्काल संचालन गर्न आग्रह गरे ।
संघका नवनिर्वाचित कार्यसमिति र परिसंघ सदस्यहरुबीच भएको अन्तरक्रियामा परिसंघका उपाध्यक्षहरु कृष्णप्रसाद अधिकारी, विरेन्द्रराज पाण्डे, हेमराज ढकालसहित परिसंघ नेशनल काउन्सिल सदस्यहरु, नेपाल बैकर्स संघका उपाध्यक्ष सन्तोष कोइराला, कार्यसमिति सदस्यहरु अजयविक्रम शाह, दिपककुमार डे, सल्लाहाकार अशोक शम्सेर राणालगायत सहभागी थिए ।
