राष्ट्रपतिको सवारी प्रकरणः चिकित्सकहरुले आईतवार देशभर आकस्मिक बाहेकका सेवा बन्द गर्ने

Advertisement

काठमाडौं । नेपाल चिकित्सक संघले आईतवार (भोलि) मुलुकभरका अस्पतालहरुमा आकस्मिक बाहेकका सेवा बन्द गर्ने भएको छ । राष्ट्रिय ट्रमा सेन्टरका वरिष्ठ अर्थोपेडिक सर्जन डा. जनिथलाल सिंह लगायत अन्य चिकित्सक तथा स्वास्थ्यकर्मीहरुमाथि प्रहरीले लाठी चार्ज गरी घाइते बनाएको घटनाको बिरोधमा  चिकित्सक संघ आन्दोलित भएको हो ।  

संघको शनिवार काठमाडौंमा बसेको बैठकले आईतवार एकदिन देशभरका सरकारी तथा गैरसरकारी, निजी, सहकारी स्वास्थ्य संस्था, अस्पताल, निजी तथा सरकारी मेडिकल कलेज, प्रतिष्ठान लगायतका सम्पूर्ण स्वास्थ्य संस्था तथा अस्पतालहरुमा आकस्मिक सेवा बाहेकका अन्य सम्पूर्ण सेवाहरु बन्द गर्ने निर्णय गरेको छ । राष्ट्रपति विद्या भण्डारीको सवारीका क्रममा शुक्रबार सिंहलाई प्रहरीले लाठी प्रहार गरी घाइते बनाएको थियो । 

Advertisement

नानसँग कुरा गर्दै नेपाल चिकित्सक संघका महासचिव डा. बद्री रिजालले स्वास्थ्य सेवा जस्तो संवेदनशील क्षेत्रमा कार्यरत चिकित्सक तथा स्वास्थ्यकर्मीहरुलाई भीभीआईपीको सुरक्षाका नाममा प्रहरीद्वारा सांघातिक आक्रमण गरी गम्भीर घाइते बनाइनु सामान्य घटना नभएको भन्दै बिरोध गर्नुपरेको बताए । 

महासचिव रिजालले हजारौंको संख्यामा स्वास्थ्य सेवा लिन आएका बिरामीहरुलाई समेत अस्पतालमा पुग्न नदिएर विशिष्ट व्यक्तिको सवारीको नाममा अलपत्र पार्ने÷आकस्मिक सेवा लिन पाउने जनताको अधिकार कुण्ठित गर्ने सेवा प्रवाहमा अवरोध गर्ने कामको बिरोध गर्नुपर्ने आवश्यकता रहेको  बताए । 

उनले विधि र विधान स्थापितका लागि नेपाल चिकित्सक संघले उठाएको यो कदमलाई साथ र समर्थन गर्न देशभरका सम्पूर्ण सर्वसाधारण नागरिक, बुद्धीजीविवर्ग, सञ्चारकर्मी तथा संघका सम्पूर्ण शाखा कार्यालयहरुले २०७९ माघ २९ गतेका लागि घोषणा गरिएको आन्दोलनलाई सफलतापूर्वक सम्पन्न गर्न आग्रह गरे । 

Advertisement

Advertisement