सगरमाथा हेर्ने धोको पूरा गरे इटलीका ७८ बर्षीय लोरेन्जोले

नाम्चे (सोलुखुम्बु) । इटालीका ७८ वर्षिय एडलब्रेटो दि लोरेन्जोले विश्वको सर्वोच्च शिखर सगरमाथा हेर्ने आफ्नो धोको पूरा गरेका छन् । उमेर ढल्किए पनि सगरमाथा हेर्न आँटका साथ सगरमाथा आधार शिविर (५३६४ मिटर) पुगेर फर्किएका उनीसँग कर्पोरेट नेपालकर्मीको गत हप्ता नाम्चेमा भेट हुन पुग्यो । 

लोरेन्जोले भने, ‘एक पटक सगरमाथा प्रत्यक्षरुपमा हेर्ने इच्छा थियो । त्यो इच्छा पूरा गरेर फर्किंदै छु ।’ संभवतः उनी अहिले स्वदेश फर्किसकेको हुनसक्छ । आधार शिविर पुगेर सगरमाथालाई नियाल्दै तस्वीरहरु खिचेर फर्किएका लोरेन्जोले आफ्नो अदम्य साहस पूरा गर्न कोभिड महामारीले ढिलो गरिदिएको सुनाए । 

बाह्र दिनको पत्रयात्राका लागि नेपाल आएका उनले १० दिनमा आफ्नो लक्ष्य पूरा गर्न सफल भए । लोरेन्जोले सामाजिक सञ्जालमा नेपालको बारेमा र सगरमाथाको बारेमा आएका कुराहरु देख्दा र पढ्दा विश्वको सर्वोच्च शिखर कस्तो होला ? भन्ने जिज्ञासा लाग्ने गरेको सुनाउँदै सगरमाथा चुचुरोसम्म पुग्न नसके पनि आधार शिविरसम्म टेक्न सक्नु आफ्नो लागि ठूलो उपलब्ध भएको सुनाए । 

लोरेन्जोका गाइड तथा हिमालय स्काई ट्राभल एण्ड एडभेन्चर कम्पनीका सञ्चालन कबिन कुइँकेल ७८ बर्ष भइसके पनि लोरेन्जोले फूर्तीका साथ १० दिनमै पदयात्रा गरेर आधार शिविरसम्म पुगेर फर्किन सफल भएको बताए । उनले भने, ‘यति छिटो उनी ट्रेक सकेर उनी फर्किनसक्ला भन्ने सोचेकै थिइन् ।’ 

हिमाली क्षेत्रको पदयामा आउनेहरुले आधार शिविरसम्म पुगेर फर्किन लोरेन्जोले सुझाव दिने गरेको पनि कुइँकेलले बताए । उनले भने, ‘हामी बेस क्याम्पबाट फकिँर्दै गर्दा हामीसँग हिडेका मान्छेहरु बेस क्याम्प बल्ल जाँदैथियो । त्यो देखेर पनि बेस क्याम्प जान गाह्रो मानिरहेका थिए । लारेन्जोलाई देखेर प्ररित हुँदैथिए ।’ 

बेस क्याम्प पुगेपछिको लोरेन्जोको अनुभव 
लोरेन्जोका गाइड कुइँकेलले आधार शिविर पुगेपछि बधाई दिँदा उनले आँशु झारेको बताए । उनले भने, ‘आफ्नो एउटा सपना पूरा भयो भन्ने खुःसीले होला, उहाँले आँसु झार्नुभयो । हामी त्यहाँ करिब ४५ मिनेट बस्यौं । त्यति उचाईमा मानिसालाई धेरै समय बिताउन गाह्रो हुन्छ । त्यसमाथि उहाँ बुढो मान्छे । तर पनि लोरेन्जो निकै खुशी देखिनुहुन्थ्यो ।’ 

गाइडदेखि सबै नेपालीहरुले आफूलाई राम्रो सहयोग गरेको र सुरक्षितरुपमा आधार शिविरसम्म पुगेर फर्किन सकेकोमा लोरेन्जोले खुशी मानेको सुनाउँदै कुइँकेलले उनलाई उनलाई राम्रो सुविधासहित पदयात्रा गराएको, बसन होटलहरु पनि राम्रो पाएको बताए । 

उनले थपे, हामीले अरु क्लाइन्टहरुलाई गाइड गर्दा थाकियो । कोही ‘अब सक्दैन्’ भन्दैथिए । कोही स्याँस्याँ गर्दै थिए । हामीले बेसक्याम्प त्यहीं हो, आउन लाग्यो भन्दै फकाउँदै र मोटिभेट गर्दै लैजानु पर्यो । तर ७८ बर्षको लोरेन्जो एकदम उर्जाका साथ हिंडेको देख्दा हामीलाई नै अच्चम लाग्यो ।