कर्पोरेट नेपालद्धारा बार्षिकोत्सवको अवसरमा मानव सेवा आश्रमलाई रु. ५० हजार सहयोग

काठमाडौं । कर्पोरेट नेपाल डटकम (बिजकेयर नेपाल प्रा.लि.)ले आफ्नो नवौं बार्षिकोत्वको अवसरमा मानवसेवा आश्रमलाई रु. ५० हजार आर्थिक सहयोग गरेको छ । 

यस संस्थाले विगतदेखि नै आफ्नो हरेक बार्षिकोत्सवमा परोपकारी संघसंस्थाहरुलाई आर्थिक सहयोग गर्दै आएकोमा यस बर्ष मानवसेवा आश्रमलाई सहयोग गरेको हो । कर्पोरेट नेपालका सम्पादक सीताराम विलासीले मानवसेवा आश्रमका अध्यक्ष रामजी अधिकारीलाई सोमबार सहयोग रकमको चेक हस्तान्तरण गरे । 

वि.सं. २०६९ भाद्र १३ गते यस्ता सहयोगापेक्षीहरुलाई उद्धार गर्ने, उपचार गर्ने, पारिवारिक पुनर्मिलन गर्ने र पुनर्मिलन हुन नसकेकाहरुको लालनपालन गर्दै आएको यो संस्थालाई अहिले सरकार तथा गैरसरकारी विभिन्न क्षेत्रबाट समेत सहयोग गर्दै आएको छ । हेटौंडामा मुख्य कार्यालय रहेको यस संस्थालाई अहिलेको अवस्थामा ल्याउन अधिकारीको ठूलो भूमिका रहेको छ । 

उनले विशेषगरी सडकपेटी र सार्वजनिक स्थलमा कसैले पनि भोकै नांगै बेसहारा भएर नाथैनाथ (पशुपतिनाथ, मुक्तिनाथ, मच्छिन्द्रनाथ, गोरखनाथ, स्वयम्भूनाथ)ले बास गरेको देशमा बस्नुनपरोस्, यसलाई अन्त्य गर्नुपर्छ भनेर १० बर्षअघि मानवसेवा आश्रम सुरु भएको बताए । 

उनले यो मानवता प्रवर्द्धन अभियान १९ वटा जिल्लामा २३ वटा सेवा केन्द्र सञ्चालनमा रहेको बताए । अधिकारीले यी सेवा केन्द्रमा करिव एक हजार छ सय सहयोगापेक्षीहरु बालबालिकादेखि आमाबुबाहरु रहेको बताए । उनले यीमध्ये एक हजार जनि मानसिक स्वास्थ्य समस्या भएका, १५२ जना बालबालिका सहयोगापेक्षीहरु रहेको जानकारी दिए । 

अधिकारीले २०८२ सालभित्र कसैले पनि अनाथ भएर बस्नुनपर्ने अवस्था निर्माण गर्ने संकल्पका साथ आश्रमले आफ्ना सेवा कार्य र पूर्वाधार तयार गर्ने काम गरिरहेको बताए । उनले अहिले १६ वटा जिल्लामा आफ्नै भवन निर्माणको काम भइरहेको बताए । अधिकारीले कुनै पनि वैदेशिक दाताको शर्तसहितको सहयोग आफूहरुले स्वीकार गर्नेनगरेको बताउँदै समाजसेवाको परिभाषा पनि परिवर्तन गर्नुपर्छ भन्ने संकल्प राखेर आफूहरुले काम गरिरहेको बताए । 

अध्यक्ष अधिकारीले सरकार र परोपकारी मन भएका व्यक्ति तथा संस्थाहरुले बार्षिकोत्सव, जन्मदिन, पितृकार्य, विवाह बर्षगाँठ जस्ता दिनमा  कसैले आर्थिक सहयोग गर्ने, कसैले भोजन गराउने गरेको बताए बताउँदै कर्पोरेट नेपालले गरेको सहयोगप्रति आभार प्रकट गरे ।