कम्पनीले जनचाहनाको प्रोडक्ट बनाएनन्ः प्राधिकरण, डिजिटल प्रोडक्ट सुरु भइसक्योः कम्पनी

काठमाडौं । नेपाल बीमा प्राधिकरणका कार्यकारी निर्देशक राजुरमण पौडेलले अब बीमा कम्पनीहरुले नयाँ बीमालेख जारी गर्दा भौगोलिक स्थितिको समेत अध्ययन विवरण उल्लेख गर्नुपर्ने बताएका छन् । 

कर्पोरेट नेपालसँगको कुराकानीमा उनले बीमा कम्पनीहरुले पूराना शैलीका बीमालेख बजारमा ल्याउँदा उल्टै बजारीकरणमा समेत असर परेको भन्दै भौगोलिक स्थितिको समेत अध्ययन विवरण माग्ने तयारी गरिएको बताए । 

यता, निर्जीवन बीमक संघका प्रवक्ता तथा नेको इन्स्योरेन्स कम्पनीका प्रमुख कार्यकारी अधिकृत (सीईओ) अशोक खड्काले बीमा कम्पनीहरुले पछिल्लो समय डिजिटल बीमालेखहरु जारी गर्ने अभ्यास गरिरहेको र त्यसले पनि धेरै नै ग्राहकको आकर्षण बढेको बताए ।

उनले नयाँ डिजिटल प्रोडक्टले बीमितहरुमा आकर्षण मात्र नभई सहजतासमेत थपेको बताउँदै तर प्राधिकरणले औंल्याएको भौगोलिक स्थितिको अध्ययनको विषयमा भने खुल्न चाहेनन् । खड्काले मर्जरपछि बीमा कम्पनीहरुले डिजिटल्ली व्यवसाय गर्न प्रयास गरिरहेको समेत बताए । नेको इन्स्योरेन्सको हकमा पनि नयाँ प्रोडक्ट ल्याउन आफूहरु लागिपरेको उनले बताए । 

सीईओ खड्काले केही नयाँ प्रोडक्टहरु बीमा बजारमा आइसकेको पनि बताए । मर्जरमा गएको सिद्धार्थ प्रिमियर इन्स्योरेन्सले समेत केही दिनअघि डिजिटल बीमालेख जारी गरेको उदाहरण दिए । 

तर प्राधिकरणले भने कम्पनीहरुले हालसम्म कस्ता बीमितका लागि प्रोडक्ट जारी गरेको हो ? अध्ययन नगरी बीमालेख ल्याउँदा समस्या सिर्जना भएको बताएको छ । कतिपय बीमा कम्पनीहरु मर्जरमा गएकाले कम्पनीहरुले आफ्नो व्यवसायमा फेरबदल गरी आकर्षण बढाउन राम्रा प्रोडक्टको ठूलो भूमिका हुने पौडेलले बताए । 

उनले हालसम्म ‘मनि व्याक’ पोलिसिमा नै बीमा कम्पनीहरुले जोड दिएको भन्दै अबदेखि एक्चुरी (बीमांकी)लाई आफ्ना कम्पनीको मात्र नभई बीमितहरुको भौगोलिक अवस्थाको समेत वास्तविक जानकारी दिएर बीमालेख तयार गर्नुपर्ने बताए । 

हालसम्म बीमा कम्पनीहरुले जनताको चाहना नहेरेको समेत पौडेलले आरोप लगाए । उनले भने, ‘जसले जेसुकै भने पनि अहिलेसम्म हाम्रा बीमा कम्पनीहरु जनताको चाहनामा केन्द्रीत भएर बीमालेख जारी गरेजस्तो देखिँदैन । जनचाहना र भौगोलिक अवस्थाको समेत अध्ययन गर्ने हो भने बल्ल बीमा कम्पनीहरुमा बीमितको संख्या बढ्छ र उनीहरुले आफ्नो व्यवसायको आकार पनि बढाउन पाउँछन् ।’

हालसम्म बीमा कम्पनीहरु मिलेर एउटै रोटी तानातान गरेजस्तो एउटै प्रोडक्टमा केन्द्रीत हुने गरेको प्राधिकरणको भनाई छ । कम्पनीहरुले भने प्राधिकरणले पनि प्रोडक्ट ठिक भएन भन्ने तर त्यही पूराना प्रोडक्टलाई स्वीकृति दिने प्रवृति नसच्याएको गुनासो गर्छन् ।