भिजिट भिसामा जाने महिला कामदारमध्ये ९९ प्रतिशत समस्यामा पर्छन्ः मन्त्री भण्डारी

काठमाडौं । श्रम, रोजगार तथा सामाजिक सुरक्षामन्त्री शरतसिंह भण्डारीले शैक्षिक परामर्श केन्द्रहरुलाई (कन्सल्टेन्सी) अध्ययन तथा कलेजको नाममा वैदेशिक रोजगारीमा पठाउन सरकारले प्रतिवन्ध लगाउने बताएका छन् । 

बिहीवार संसदको उद्योग तथा वाणिज्य र श्रम तथा उपभोक्ता हित समिति बैठकमा उनले पछिल्लो समय वैदेशिक रोजगारीको लागि व्यक्तिगत र भिजिट भिषाको नाममा जानेहरुमा बढी विकृति देखिएको बताए । भण्डारीले उक्त काम म्यानपावरहरुभन्दा पनि कन्सल्टेन्सीहरुमार्फत अध्ययन र कलेजको नाममा भइरहेको पाइएको बताए । 

मन्त्री भण्डारीले पछिल्लो समय ९९ प्रतिशत भिजिट भिषामा जाने महिला कामदारहरु समस्या रहेको बताए । उनले घरेलु कामदारको विषयमा सरकारले रोके पनि जाने क्रम भने नरोकिएको बताए । भण्डारीले घरेलु कामदार रोक्नको लागि समितिको निर्देशन आवश्यक रहेको बताए । 

भण्डारीले सरकारले सम्बन्धित मुलुकको अवस्था  र सुरक्षाको मापदण्ड अपनाएर मात्रै घरेलु कामदार पठाउने निर्णय गरेको बताए । उनले सरकारले वैदेशिक रोजगारीमा जानेहरुलाई अनिवार्य रोजगारीमा जाने देशको भाषा र सीप तालिम दिएर मात्रै पठाउने व्यवस्था गरिने बताए । 

मन्त्री भण्डारीले सरकारले वैदेशिक रोजगारीमा देखिएका वर्तमान समस्या समाधान गर्ने गरी काम गरिरहेको पनि दावी गरे । उनले भने, ‘पछिल्लो समय वैदेशिक रोजगारीको लागि व्यक्तिगत र भिजिट भिसाको नाममा जानेहरुमा विकृति देखिएको छ । जुन शैक्षिक परामर्श केन्द्रहरुले(कन्सल्टेन्सी) अध्ययन र कलेजको नाममा पठाउने काम गरेको छ । तर उनीहरुको त्यसमा कुनै उत्तरदायित्व छैन । संस्थागत हिसावमा वैदेशिक रोजगार व्यवसायी संघले पठाएको अवस्थामा रेकर्ड रहन्छ । कुन म्यानपावरले कहाँ कति श्रमिकहरु पठाएको छ ? थाहा हुन्छ । यदि गलत भएको छ भने सरकारले समातेर कारबाही गर्न सकिन्छ । तर अन्य ठाउँबाट विदेश पठाउनेहरुको हकमा कसले कहाँ पठाएको छ भन्ने रेकर्ड छैन् ।’ 

उनले थपे, ‘पछिल्लो समय विशेष गरी महिला कामदारहरुमा समस्या आएको छ । ९९ प्रतिशत भिजिट भिसामा जाने महिला कामदारहरु समस्या छ । संस्थागत रुपमा गएकोमा समस्या छैन् । सरकारले वैदेशिक रोजगारीमा जाने व्यक्तिहरुले श्रम स्वीकृत लिएर मात्रै जानुपर्ने व्यवस्था प्रतिकुल हुनेगरी शैक्षिक परामर्श केन्द्रहरुले (कन्सल्टेन्सी) यस्तो नगर्नको लागि मन्त्रालयलाई पत्राचार गर्ने तयारीमा छौं । घरेलु कामदारको विषयमा सरकारले रोकेको छ तर जाने क्रम रोकिएको छैन । समितिको निर्देशन,सम्बिन्धित मुलुकको अवस्था  र सुरक्षाको मापदण्ड अपनाएर मात्रै घरेलु कामदार पठाउने निर्णय गरेका छौं ।’

मन्त्री भण्डारीले फ्रि भिषामा विगतका वर्षहरुमा १५ हजार मानिसहरु वैदेशिक रोजगारीमा गएको बताए । उनले वार्षिक रुपमा १५ हजार मानिसहरु वैदेशिक रोजगारीमा गएको बताए । भण्डारीले फ्रि भिसामा कामदारको माग भए अनुसार पठाउने गरीएको बताए । 

उनले फ्रि भिषा फ्रि टिकटको लागि सरकारले मेलेसियासँग सम्झौता गरेको भन्दै त्यहाँका कम्पनीहरुले श्रमिकको मागअनुसार विज्ञापन गरेर फ्रि भिसामा पठाउने व्यवस्था रहेको दावी गरे ।