मुलुकलाई संकटबाट निकास दिन सत्ता गठवन्धन विघटन हुनुपर्छः प्रभु साह

काठमाडौं । आम जनता पार्टी (आजपा)का अध्यक्ष प्रभु शाहले सत्तारुढ गठबन्धन सरकार विघटन हुनुपर्ने बताएका छन् । मुलुकलाई संकटबाट निकास दिनका लागि वर्तमान सरकार विघटन गरी अन्तरिम सरकार बनाएर अघि बढ्नु नै सही निर्णय हुने बताएका छन् । 

सोमबार आफ्नो पार्टीको बैठकमा शाहले विचौलिया र दलालहरुको हिस्साको रुपमा काम गरिरहेको सरकारलाई विघटन गर्नुको विकल्प नरहेको दोहोर्याए । उनले मुलुकमा विद्यमान राजनीतिक अराजकतालाई अन्त्य गर्नका लागि राष्ट्रपतीय प्रणालीमा जानुपर्ने बताए । 

Advertisement

शाहले सरकारले मिटरब्याजीको नाममा भ्रष्टाचार र घुसखोरीलाई बढावा दिएको उल्लेख गर्दै त्यसविरुद्ध आफ्नो पार्टीले आन्दोलन गर्ने चेतावनी दिए । उनले भने, ‘मिटरब्याजीको नाममा भ्रष्टाचार, घुसखोरी चरम सीमामा छ । यसलाई रोक्न सबैको ध्यान जाओस् । खासगरी सरकार, जसले मिटरब्याजीमार्फत गरिवलाई न्याय दिन्छु भनेको थियो । आज ती कुरा हावादारी जस्तो भयो । गरिवले न्याय पाएनन् । अन्ततः दलालले लाभ पाए । घुसखोर कर्मचारीले लाभ पाए । र, आज एउटा खेल तमासा सीडीओ कार्यालयहरुमा भइराखेको छ ।’ 

शाहले थपे, ‘म विशेष आग्रह गर्न चाहन्छु । महंगी ठूलो समस्या भएको छ । सरकार निकम्ममा देखिएको छ । मिसावट, कालोबजारी देशको प्रमुख समस्या भएको छ । र, त्यसलाई रोक्न सरकार निकम्मा जस्तो देखिन्छ । तपाईहरुलाई थाहा छ–नेपालमा चिनीको हाहाकार छ । एक दिइ, दुई दिन होइन, महिनौंदेखि यो समस्या छ । तर पनि पर्याप्त चिनी मान्छेले पाउन नसकेका छैनन् । तपाईमा ८० रुपैयाँ केजीमा पाइने चिनी काठमाडौंमा १६० रुपैयाँ पर्छ । यो भन्दा पीडादायी के हुन्छ ? सरकारले यो रेट रोक्नै नसक्ने हो र । के सरकारले आपूर्ति व्यवस्था मिलाउनै नसक्ने हो र ? जिरा ५ सय चिज आज १५ सय पर्छ । यसलाई नियन्त्रण गर्न यदि सक्दैन भने, जनतालाई सहज ढंगले सेवा दिन सक्दैन भने छोडनु पर्छ । सक्छौं भने परिणाम देखाउ सरकार । बिचौलिया, दलालहरुको हिस्सा हो सरकार । यसै हिसावले सरकार चलिराख्यो भने नेपाली जनताको भविष्य छैन । यतातिर सबैको ध्यान जाओस भन्ने चाहन्छु । हाम्रो यो बैठकले यसलाई सही निष्कर्ष दिन सक्नु पर्छ । हामीले भनेका छौं–देशको निकासको सही निर्णय भनेकै यो सरकारको विघटन, यो व्यवस्थाको विकल्पमा अन्तरिम सरकार बनाएर अघि बढ्ने हामीले भनेका छौं । राष्ट्रपतीय प्रणालीमा जानुपर्छ । अनि मात्रै देशमा स्थिरता प्रदान हुन्छ । अनैतिकताको राजनीतिलाई अन्त्य गर्नुपर्छ ।’

उनले राजनीतिक दलहरुले जनमतको अपमान गरेको भन्दै आफ्नो पार्टीले जनमत फिर्ता अभियानलाई अघि बढाउने बताए । 

Advertisement