सोमबार २४ बैशाख, २०८१ | Monday May 06, 2024
काठमाडौं । आइसल्याण्ड सरकारले व्यावसायी विदुषी राणालाई नेपालका लागि उक्त देशको अवैतनिक महावाणिज्यदूतमा नियुक्त गरेको छ । उनी लोकप्रिय गोल्डस्टार सुज (किरण सुजको उत्पादन)की कार्यकारी निर्देशक हुन् ।
राणालाई परराष्ट्र मन्त्रालयका चिफ अफ प्रोटोकल दिलीप पौडेलले बिहीबार ओहोदाको प्रमाणपत्र हस्तान्तरण गरे । दुई देशबीचको कूटनीतिक सम्बन्धलाई सुमधुर बनाउने प्रतिबद्धतालाई जोड दिँदै आइसल्याण्ड सरकारले राणालाई अवैतनिक वाणिज्यदूतमा नियुक्त गरेको उनको सचिवालयले जनाएको छ ।
अवैतनिक वाणिज्यदूतको हैसियतमा उनले नेपाल र आइसल्याण्डबीचको पर्यटन, सांस्कृतिक आदानप्रदान, व्यापार र लगानीलाई सहज बनाउन प्रयास गर्दै दुवै राष्ट्रको पारस्परिक हितका लागि समझदारी र सहयोगलाई बढावा दिने प्रयास गर्नेछिन् ।
राणाले आगामी दिनमा नेपाल–आइसल्याण्डको बहुआयामिक सम्बन्धलाई नयाँ उचाइमा पुर्याउने प्रतिबद्धता व्यक्त गरेकी छन् ।
