यी तीन कम्पनीको साधारसभा आज, एकले मात्र लाभांश पारित गर्ने

काठमाडौं । आज फागुन २० गते आइतबार । तीन संस्थाहरुको वार्षिक साधारणसभा बस्दैछ । हिमालयन रि–इन्स्योरेन्स, आईजीआई प्रुडेन्सियल इन्स्योरेन्स र स्वाभिमान लघुवित्त वित्तीय संस्था लिमिटेडको साधारणसभा बस्दैछ । यी तीन कम्पनीमध्ये हिमालयन रिले मात्रै लाभांश प्रस्ताव गरेको छ । बाँकी दुई कम्पनीले बिनालाभांश नै साधारणसभा बोलाएका हुन् । 

हिमालयन रिको साधारणसभा राष्ट्रिय सभा गृह, प्रदर्शनीमार्ग–काठमाडौंमा बिहान ११ बजे सुरु हुनेछ । सभालेले गत वर्षको मुनाफाबाट शेयरधनीलाई ४ प्रतिशत बोनस शेयर र कर प्रयोजनार्थ ०.२१ प्रतिशत नगद गरी कुल ४.२१ प्रतिशत लाभांश वितरण गर्ने प्रस्ताव पारित गर्नेछ ।

सभा तथा लाभांश वितरण प्रयोजनार्थ कम्पनीले फागुन ७ गते बुक क्लोज गरेको थियो । जसअनुसार फागुन ६ गतेसम्म नेप्सेमा कायम शेयरधनीले सभामा भाग लिन तथा लाभांश प्राप्त गर्न सक्नेछन् । 

त्यसैगरी, आईजीआई प्रुडेन्सियलको सभा लैनचौर ब्यांकेट, काठमाडौंमा बिहान १० बजे सुरु हुनेछ । सभाले गत आवको वित्तीय विवरणमा छलफल गरी पारित गर्नुका साथै चालू आवका लागि लेखापरीक्षक नियुक्त गर्ने प्रस्ताव पेस गर्नेछ ।

सभाले एक जना महिलासहित संस्थापक समूहबाट ४ जना र सर्वसाधारण समूहबाट २ जना प्रतिनिधित्व हुने गरी सञ्चालकको निर्वाचन पनि गर्नेछ । सभा प्रयोजनार्थ कम्पनीले फागुन १० गते बुक क्लोज गरिसकेको छ । अतः फागुन ९ गतेसम्म कायम शेयरधनी मात्रै सभामा भाग लिन पाउनेछन् । 

त्यसैगरी, स्वाभिमान लघुवित्तको सभा कम्पनीको केन्द्रीय कार्यालय तिलोत्तमा ५ रुपन्देहीमा बिहान ११ बजेदेखि सुरु हुनेछ ।

सभाले गत आर्थिक वर्षको वार्षिक प्रतिवेदनका साथै, नाफा–नोक्सान तथा नगद प्रवाह लगायतका विषय छलफल गरी पारित गर्नेछ । त्यस्तै, चालू आवका लागि लेखापरीक्षक नियुक्ति र निजको पारिश्रमिक तोक्ने र सर्वसाधारण शेयरधनीको तर्फबाट १ जना सञ्चालक नियुक्ति गर्नेछ । 

सभा प्रयोजनार्थ कम्पनीले फागुन ११ गते बुक क्लोज गरिसकेको छ । यसअनुसार फागुन १० गतेसम्म नेप्सेमा कारोबार भई कायम शेयरधनी सभामा उपस्थित हुन पाउनेछन् ।