बिहीबार २० बैशाख, २०८१ | Thursday May 02, 2024
काठमाडौं । निरन्तर घटिरहेको शेयर बजार आज भने दोहोरो अंकले उचालिएको छ । कारोबार रकम पनि सवा ४ अर्ब नाघेको छ ।
नेपाल स्टक एक्सचेञ्ज लिमिटेड (नेप्से) का अनुसार आज बजार २२.७५ अंकले बढेको हो । १.१३ प्रतिशतले बजार बढ्दा नेप्से २०२६.८१ अंकमा उक्लिएको छ ।
आज ३११ कम्पनीका १ करोड १२ लाख १० हजार १ सय २ कित्ता शेयर किनबेच हुँदा ४ अर्ब २५ करोड ६६ लाख ७६ हजार ३ सय २२.५६ रुपियाँ बराबरको करोबार भएको हो ।
बजार बढेको दिन विभिन्न ८ कम्पनीका लगानीकर्ताहरुले ९ प्रतिशत बढी नाफा कमाएका छन् । नेपाल फाइनान्स, पोखरा फाइनान्स, जानकारी फाइनान्स र गुराँस लघुवित्तका लगानीकर्ताहरुले १०–१० प्रतिशतले नाफा कमाएका हुन् ।
त्यस्तै मानुषी लघुवित्त, वीन नेपाल लघुवित्त, दोल्ती पावर र सबैको लघुवित्तका लगानीकर्ताहरुले क्रमशः ९.९९, ९.७४, ९.५५ र ९.०२ प्रतिशतले नाफा कमाए ।
यसैगरी आज सबैभन्दा बढी तारागाउँ रिजेन्सी होटलका लगानीकर्ताहरुले १० प्रतिशतले घाटा व्यहोरे ।
आज नेपाल रि–इन्स्योरेन्सको संस्थापक शेयर सबैभन्दा बढी किनबेच भएको हो । उक्त कम्पनीको ९५ करोड २० लाखको शेयर किनबेच भएको नेप्सेले जनाएको छ ।
आज होटल समूहबाहेक अरुमा हरियाली छाएको छ । होटल समूह ०.०८ प्रतिशतले घट्दा वित्त समूह सबैभन्दा बढी ५.९५ प्रतिशतले बढेको छ ।
