‘भ्रष्टाचारको उजुरी पर्दैमा राजीनामा दिने हो भने त्यसको सहमती गर्न काँग्रेस तयार छ ?’

काठमाडौं । गृहमन्त्री रवि लामिछानेले सहकारी ठगी प्रकरणमा उजुरी पर्दैमा आफूले पदबाट राजीनामा नदिने स्पष्ट पारेका छन् । 

उनले भ्रष्टाचारको उजुरी पर्दैमा राजीनामा दिने हो भने त्यसका सहमती गरेर अघि बढ्न काँग्रेस तयार हुनुपर्ने शर्त समेत राखेका छन् । काँग्रेसले सहकारी ठगी प्रकरणमा मुछिएकाले छानविनका लागि संसदीय समिति बन्नुपर्ने भन्दै संसद बैठक अवरुद्ध पारिरहेका बेला संसद परिसरमा मंगलबार लामिछानेले मंगलवार संसद भवन परिसरमा सञ्चारकर्मीहरुले राखेका जिज्ञासाको जवाफ दिने क्रममा उजुरी पर्दैमा छानविन गर्ने कुरा संसदीय मूल्य, मान्यता भित्र नपर्ने जिकिर समेत गरे । 

लामिछानेले थपे, ‘सरकारको न्यूनतम साझा कार्यक्रममा पनि हामीले भनेका छौ–कुनै पनि कालखण्डका भ्रष्टाचारको छानविन गर्नुपर्छ । अस्ती राजीनामा दिनुभएको हो र ? झण्डा हल्लाएर अख्तियारमा बयान दिन जानु भएको हो । राजीनामा दिए जस्तो त मलाई लागेन । सबै किसिमका नजिरहरु छन । सबै किसिमका अभ्यासहरु छन् । त्यसैले उद्देश्य के हो ? उद्देश्य भनेको यो देशलाई भ्रष्टाचार मुक्त गराउने हो कि ? अनियमितताबाट मुक्त गराउने हो भने साँच्चनै कमिटमेन्ट हो भने त आउनुस्न बृहत, स्वतन्त्र छानविन आयोग गठन गरौं । छानविन समिति गठन गरौं । जसले २०४७ सालदेखि आजसम्मका हरेक काण्डहरु । काण्डैकाण्ड भित्रको थुप्रो भित्र बसेर, काण्डहरुको माध्यामबाट वाक्क भएर पेशा र व्यवसाय गरेका आएका हामीलाई अव यस्ता गफहरुमा धेरै विश्वास छैन । तर आफ्नो अभ्यासहरुको कुरा हो । उहाँहरुले आफ्नो अभ्यास गर्नुहुन्छ । हामी हाम्रो अभ्यास गर्छौ ।’ 

कसैले गरेको ठाडो उजुरीको आधारमा, सूचना दिएको आधारमा समिति बनाउनुपर्ने गरी हाम्रो संसदीय मर्यादा त्यति तल झरिसकेको छ र ? भन्दै उनले संसदको गौरवको रक्षा गर्नका लागि दोबाटोमा उठेका हरेक कुराहरुको समिति बनाउने हो भने हुन्छ गरौं भने । लामिछानेले ‘हामीले त भनेका छौ नि प्रश्न उठने बित्तिकै ठाडो कसैले जाहेरी, सूचना, निवेदन दिने बित्तिकै तुरुन्तै सांसदले राजीनामा दिउ’ भन्दै भने, ‘हामीले हुन्छ भनिसक्यौ, नाई भनेका छैनौै । तर व्यक्तिमा मात्रै केन्द्रित रहने हो भने हामी आएर बनेको हो र ? भनेर प्रश्न गरे । 

लामिछानेले आफूमाथि व्यक्तिगत आरोपमा संसदीय छानविन समिति बनाउनुपर्ने मागको कुनै औचित्य नभएको बताए ।