बैंकको एउटा शाखाले सरदर कति जनालाई दिन्छ बैंकिङ सेवा ?

काठमाडौं । नेपालमा सञ्चालित बैंक तथा वित्तीय संस्था र लघुवित्तका एउटा शाखाले दुई हजार ५१५ जनालाई बैंकिङ सेवा दिनसक्ने देखिएको छ । सरकारले आइतबार सार्वजनिक गरेको आर्थिक सर्वेक्षण २०८०–८१ को तथ्यांकले यस्तो देखाएको हो । 

बैंक तथा वित्तीय संस्थाको शाखा सञ्जाल विस्तार, विद्युतीय माध्यमबाट हुने कारोबार र वित्तीय साक्षरता प्रवर्द्धनका कारण वित्तीय पहुँचमा सुधार भएको आर्थिक सर्वेक्षण प्रतिवेदनमा उल्लेख छ । ‘२०८० फागुनमा बैंक तथा वित्तीय संस्थाको शाखा सङ्ख्या (लघुवित्त समेत)का आधारमा प्रतिशाखा जनसङ्ख्या २,५१५ पुगेको छ । यस्तो जनसङ्ख्या २०७९ फागुनमा २,५१० रहेको थियो,’ आर्थिक सर्वेक्षणमा भनिएको छ । ‘यस अवधिमा मोबाइल बैंकिङ प्रयोगकर्ता दुई करोड ३७ लाख ८३ हजार र इन्टरनेट बैंकिङ सेवाका प्रयोगकर्ता १८ लाख ७४ हजार रहेका छन् ।’

निजी क्षेत्रतर्फको कर्जा विस्तार पछिल्लो समय समयमा केही वृद्धि भएको बताइएको छ । चालु आर्थिक वर्षको फागुनसम्म निजी क्षेत्रतर्फ प्रवाहित कर्जा ५.६ प्रतिशतले बढेको छ । यस अवधिमा विस्तृत मुद्राप्रदाय ७.७ प्रतिशतले बढेको प्रतिवेदनमा उल्लेख छ । 

२०८० फागुनसम्म एक लाख ३० हजार ८४४ ऋणीलाई सहुलियतपूर्ण कर्जा प्रवाह भई एक खर्ब ४९ अर्ब ३० करोड रुपियाँ कर्जा लगानीमा रहेको बताइएको छ । यस्तो कर्जा सबैभन्दा बढी व्यावसायिक कृषि तथा पशुपन्छी तर्फ लगानी भएको छ । त्यस क्षेत्रमा एक खर्ब ७७ करोड लगानीमा भएको तथ्यांकमा उल्लेख छ । 

यस्तै, फागुनसम्म वैदेशिक रोजगार म्यादी जीवन बीमा समेत गरी ४३.१६ प्रतिशत नेपालीमा बीमाको पहुँच पुगेको छ । समीक्षा अवधीमा बीमा प्रिमियम ४.४ प्रतिशत वृद्धि भई एक खर्ब २४ अर्ब ८९ करोड पुगेको आर्थिक सर्वेक्षणमा उल्लेख छ । 

यस्ते, फागुनसम्म सहकारी संस्था संख्या ३१ हजार ४५० पुगेको छ । त्यसमा ७३ लाख ८५ हजार ५२८ जना शेयर सदस्य छन् । समीक्षा अवधीसम्म सहकारी क्षेत्रमा चार खर्ब ७८ अर्ब ११ करोड रुपियाँ बचत परिचालन भई रू. चार खर्ब पाँच अर्ब तीन करोड कर्जा प्रवाह भएको देखिएको छ ।