शुक्रबार १४ बैशाख, २०८१ | Friday Apr 26, 2024
काठमाडौं । गैरआवासीय नेपाली संघ (एनआरएनए) का पदाधिकारीले अर्थमन्त्री प्रकाशशरण महतसँग भेट गरेका छन् । शुक्रबार सिंहदरबारमा भएको भेटमा संघका प्रतिनिधिले ज्ञापनपत्रमार्फत् आफ्ना समस्या राखेका थिए ।
भेटमा संघका तीन जना अध्यक्षहरु बद्री केसी, कुल आचार्य, रविना थापालगायत सहभागी थिए । उनीहरुले नेपालमा लगानीमैत्री वातावरण बनाउन, गैरआवासीय नेपालीको नागरिकताको निरन्तरताका कुराहरु राखेका थिए ।
अर्थमन्त्री महतले भने विशेषगरी राष्ट्रिय स्वतन्त्र पार्टीका अध्यक्ष रवि लामिछानेको नागरिकता प्रकरणपछि केही जटिलता आएको स्वीकार गर्दै एनआरएनको नागरिकताको हकमा संविधानमा भएको व्यवस्थालाई छिटो कार्यान्वयनमा नल्याउँदा व्यवहारिक कठिनाइ भएको बताए ।
उनले भने, ‘नेपालमा अहिले लगानीको समस्या छ । सुरक्षित लगानीका लागि एनआरएनएको साथमा सरकार छ । सरकारले एनआरएनएलाई निराश हुने काम कहिले गर्दैन । लगानी गर्न चाहने साथीहरुले कुनै कारणबाट निरुत्साहित हुनु पर्दैन ।’
लगानीमैत्री वातावरणमा समस्या भए आर्थिक ऐनमार्फत् सम्बोधन गरिने महतले आश्वासन दिए । आगामी बजेटमार्फत् पनि धेरै कुरा सम्बोधन गर्न सकिने उनको भनाई छ ।
भेटमा एनआरएनए संस्थापक महासचिव भीम उदास, वर्तमान कोषाध्यक्ष कृष्ण तिमल्सिना, पूर्वउपाध्यक्ष रामेश्वर साह, सोनाम लामा, एनआरएनए युकेका पूर्वअध्यक्ष योगेन क्षेत्रीलगायत सहभागी थिए ।
