सूचना प्रविधिबाट प्रत्यक्ष ५ लाख र अप्रत्यक्षतर्फ १० लाख रोजगारी सिर्जना गर्ने दावी

काठमाडौं । सरकारले नेपाललाई सूचना प्रविधिको हबको रुपमा विकास गरिने बताएको छ । 

अर्थमन्त्री बर्षमान पुनले मंगलबार संसदमा आगामी आवको बजेट प्रस्तुत गर्दै यसका लागि आगामी वर्षबाट सूचना प्रविधि दशक मनाउने बताए । 

पुनले नेपालमा सूचना प्रविधिमा डाटा सुरक्षा गर्ने व्यवस्था मिलाउने, डिजिटल नेपाल परिमार्जन गर्ने भन्दै डिजिटल फ्रेमवर्क कार्यान्वयनका लागि ५९ करोड विनियोजन गरिएको बताए । 

बजेटमा डिल्लीबजारमा बहुतले संरचना, खुमलटारमा ‘ज्ञान पार्क’ निर्माणको पनि परिकल्पना गरिएको छ । काठमाडौं उपत्यका र बुटवलमा उपलब्ध सरकारी तथा निजी भवन समेत उपयोग गरी उच्च गतिको इन्टरनेट, विद्युत, सुरक्षा लगायतको पूर्वाधारसहित सूचना प्रविधि पार्क सन्चालनको काम अगाडि बढाउने सरकारको घोषणा छ । 

यस्तो पार्कमा तीन वर्षका लागि वर्क स्टेसन सन्चालन गर्न निःशुल्क स्थान उपलब्ध गराइने छ ।

सार्वजनिक, निजी साझेदारीमा अत्याधुनिक सूचना प्रविधि हब सन्चालनको लागि काठमाडौंको डिल्लीबजारस्थित चारखालमा बहुतले संरचना निर्माण गरिने अर्थमन्त्री पुनले बताए ।

ललितपुरको खुमलटारमा ‘ज्ञान पार्क’ स्थापना गर्न १७ करोड रुपियाँ विनियोजन गर्दै पुनले स्वदेशमा उत्पादित सफ्टवेयरलाई प्राथमिकता दिई सार्वजनिक निकायले उपयोग गर्ने व्यवस्था मिलाउने बताए । 

सरकारी डाटा सेन्टरको स्तरोन्नती गरिने र निजी क्षेत्रबाट सञ्चालन हुने डाटा सेन्टरको लागि मापदण्ड तयार गरिने उनले बताए । पुनले विद्युतीय तथ्यांकको भण्डारण, सुरक्षा र उपयोगलाई व्यवस्थित र भरपर्दो बनाइने बताउँदै सूचना प्रविधिका विद्यार्थीलाई इन्टर्नको व्यवस्था गर्ने बताए । 

सरकारले सूचना प्रविधि विषयमा स्नातक र स्नातकोत्तर तहमा अध्ययन गरिरहेका युवालाई सूचना प्रविधि सम्बद्ध उद्योगमा इन्टर्न गर्ने व्यवस्था मिलाइने जनाएको छ । सबै वडा केन्द्र, सामुदायिक विद्यालय र स्वास्थ्य केन्द्रमा ब्रोडब्याण्ड इन्टरनेट सेवा पुर्याइने, डिजिटल डिभाइड कम गर्न पिछडिएको वर्ग, क्षेत्र र महिलाको सूचना प्रविधिमा पहुँच बिस्तार गरिने पनि सरकारले बताएको छ ।