भारतसँग विद्युत व्यापार सम्झौता मेरै पालामा भइसकेको हो, अहिलेको ‘पुरक’ मात्रै होः काफ्ले

काठमाडौं । नेपाल विद्युत प्राधिरणका पूर्वकार्यकारी निर्देशक मुकेश काफ्लेले भारतसँग विद्युत व्यापार सम्झौता सुशील कोइराला प्रधानमन्त्री भएको बेला आफ्नो कार्यकालमा भएको बताएका छन् । उनले अहिलेको प्रधानमन्त्री पुष्पकमल दाहालको भारत भ्रमणका क्रममा भएको सम्झौता नयाँ नभई पुरक सम्झौता मात्रै भएको बताएका छन् । 

कर्पोरेट नेपालसँगको कुराकानीमा काफ्लेले भने, ‘सन् २०१४ मा तत्कालिन प्रधानमन्त्री सुशील कोइरालाको पालामा, जतिबेला आफू नेपाल विद्युत प्राधिकरणको कार्यकारी निर्देशक भएको बेला, केन्द्रीयस्तरमा विद्युत व्यापार सम्झौता भएको हो । त्यसकारण यो कुनै नयाँ सम्झौता होइन् । यो पुरक सम्झौता मात्रै हो ।’ अहिले भारतको प्रतिस्पर्धी बजारमा नेपालले ४५२ मेगावाट विद्युत निर्यात गर्न सकेको आफ्नो पालामा भएको सम्झौताको प्रतिफल भएको उनको भनाई छ । 

साथै, उनले प्रधानमन्त्री दाहालको अहिलेको भारत भ्रमणका क्रममा भएको दीर्घकालिन विद्युत व्यापार र नेपालबाट १० हजार मेगावाट विद्युत बिक्री गर्ने कुराबाट अहिले नै खुशी हुने बेला नरहेको बताएका छन् । उनले नेपाललाई विद्युत आयात गर्न हाम्रो संरचनाले भ्याएसम्म कुनै अवरोध नभए पनि निर्यातको कुरामा धेरै अवरोध रहेको बताउँदै तर निर्यातका लागि भारतका धेरै सीमा र शर्तहरु रहेको अहिलेकै पुरक सम्झौताबाट पनि देखिएको बताए । यद्यपि अहिले भएका सम्झौताको विस्तृत विषय अध्ययन गर्न बाँकी रहेको काफ्लेले बताए । 

भारतले आयात गर्न तयार भएको भनिएको १० बर्षमा १० हजार मेगावाट विद्युत आफ्नो लगानीका आयोजनाबाट मात्रै हो वा नेपालमा बनेका सबै आयोजनाबाट हो ? यो महत्वपूर्ण प्रश्न हो भन्दै उनले सम्झौता सार्वजनिक खपतका लागि मात्रै गरिएको हो वा वास्तवमै कार्यान्वयनका लागि गरिएको हो ? कन्टेन्ट हेरेर मात्रै भन्न सकिने बताए । 

जलस्रोत तथा उर्जा क्षेत्रका जानकारसमेत रहेका काफ्लेले चिनियाँ पक्षको संलग्नता तथा लगानी रहेका नेपालका विद्युत आयोजनाका विजुली किन्न भारत तयार नरहेको देखिनु चिन्ताको विषय भएको बताए । यस कुराले अबको बर्खामा माथिल्लो तामाकोशीबाट उत्पादित विजुली ठूलो मात्रामा खेर जाने अवस्था रहेको उनको भनाई छ । 

फरक प्रसंगमा काफ्लेले आफू पनि एउटा हिन्दू भएकाले आफ्नो देशको प्रधानमन्त्रीले भारत भ्रमणका क्रममा गेरु ब्रस्त लगाएर महाकालेश्वर मन्दिरमा पुजापाठ गरेको देख्दा खुसी लागेको बताए । प्रधानमन्त्रीको विगत हेरेर यस विषयमा टिकाटिप्पणी हुनु स्वाभाविक हो भन्दै उनले प्रधानमन्त्री दाहालमा सदबुद्धि आयोस र भगवानले उनको रक्षा गरुन भन्ने कामना पनि गरे । 

थप कुराकानी भिडियोमाः