बुधबार २ जेठ, २०८१ | Wednesday May 15, 2024
वाणिज्य बैंकहरुमा मुद्दती निक्षेप राखेर ब्याज आर्जन गर्ने त्यसैमा लगानीको मुख्य स्रोत विदेशी लगानी नै हो भन्ने तरिकाले चलिरहेको भन्दै त्यसमा सुधार हुन आवश्यक रहेको बताइन् ।
काठमाडौं । नेपाल राष्ट्र बैंककी डेपुटी गभर्नर निलम ढुंगानाले नेपालमा भित्रिएको वैदेशिक लगानी सन्तोषजनक नभएको बताएकी छन् ।
शुक्रवार नेपाल उद्योग परिसंघ (सीएनआई) ले आयोजना गरेको बजेट वाच कार्यक्रममा उनले विदेशी लगानी आकर्षित गर्ने सम्बन्धित सरकारी निकायहरुले समन्वयकारी भूमिकामार्फत झन्झट हटाउन आवश्यक रहेको बताइन् ।
ढुंगानाले राष्ट्र बैंकले वैदेशीक लगानीका झन्झटिला प्रक्रिया हटाउने विषयमा काम गरिरहेको जानकारी दिइन् । उनले विदेशी लगानी आकर्षणको लागि नीतिगत सुधारमा सबैले पहल गर्न आवश्यक रहेको बताउँदै गत आर्थिक वर्षमा सात अर्ब रुपियाँ मात्रै विदेशी लगानी भित्रिएको तथ्यांक रहेको, जुन सन्तोषजनक नरहेको बताइन् ।
ढुंगानाले आर्थिक वर्ष २०७८–७९ मा १८ अर्ब ५६ करोड र २०७९–८० मा सात अर्ब ७० करोड विदेशी लगानी आएको तथ्य प्रस्तुत गर्दै चालु आर्थिक वर्षको दुई महिनामा दुई अर्ब ९९ करोडको विदेशी लगानी आएको बताइन् ।
उनले विदेशी लगानीको लागि हेजिङ सुविधा नेपालमा लागू हुनसके विदेशी लगानी र ऋण प्रोत्साहित हुने बताइन् । डेपुटी गभर्नर ढुगानाले क्रेडिट रेटिङ गर्ने कुरामा विदेशीहरुले पनि कुरा उठाउने गरेको भन्दै क्रेडिट रेटिङ नहुँदा विदेशी लगानी आउन सकेको बताइन् ।
क्रेडिट रेटिङ गर्ने कामको शुरुवात गर्न सम्बन्धित निकायहरुको समन्वयकारी भूमका आवश्यक रहेको उनको भनाई छ । ढुंगानाले नेपाल राष्ट्र बैंक संधै यो विषयमा सकारात्मक रहेको बताइन् । उनले वाणिज्य बैंकहरुमा मुद्दती निक्षेप राखेर ब्याज आर्जन गर्ने त्यसैमा लगानीको मुख्य स्रोत विदेशी लगानी नै हो भन्ने तरिकाले चलिरहेको भन्दै त्यसमा सुधार हुन आवश्यक रहेको बताइन् ।
ढुंगानाले त्यसलाई पूर्वाधार, उत्पादनशील क्षेत्रमा लगानी गर्नसके आर्थिक विकासमा ठूलो सहयोग पुग्ने बताइन् ।
