सम्पत्ति बीमामा सरकार नै पछाडि पर्यो, अहिलेसम्म सिंहदरबारको बीमा छैन्ः सिलवाल

काठमाडौं । नेपाल बीमा प्राधिकरणका अध्यक्ष सूर्य सिलवालले आर्थिक क्षेत्रको महत्वपूर्ण पाटो बीमा भए पनि बीमाको काममा राज्य नै पछाडि रहेको बताएका छन् । 

बुधबार साँझ कर्पोरेट नेपालको दर्शौं बार्षिकोत्सवमा उनले हामीले बनाएको कुरालाई बिकास मान्यौ तर यसको दिगोपनाको कुरा गरेनौं भन्दै हामीले बनाइसकेको कुराको दिगोपना कहाँ हुन्छ ? भन्ने कुरा बजेटले बोल्दैन भने । 

अहिले भने मन्त्रिपरिषदले निर्णय गरेर देशभरका सरकारी सम्पत्तिको गणना गरी बीमाको दायरामा ल्याउने निर्णय भने गरेको स्मरण गर्दै उनले यो निर्णय सकारात्मक रहेको र कार्यदलले पनि काम गरिरहेको बताए । सिलवालले राज्य र सरकारका प्रमुखहरु बस्ने ठाउँको नै बीमा छैन भन्दै भोलि कुनै दैवीप्रकोपमा पर्यो भने राज्यले कहाँबाट लगानी ल्याएर बनाउँछ ? भनी प्रश्न गरे । 

अध्यक्ष सिलवालले बीमा नगर्दा २०७२ सालको भूकम्पमा राज्यले ठूलो नोक्सानी भोग्नुपरेको कुरा सम्झिए । तर सोही समयमा बीमा गरेका घरहरुले बीमा कम्पनीहरुबाट १६ अर्ब रुपियाँ पाउन सकेको उदाहरण दिए । सिलवालले बीमा गर्न बरु निजी क्षेत्र अगाडि रहेको र बीमालाई बुझेको बताउँदै तर सरकारले यो कुरालाई प्राथमिकतामा नराखेको बताए । 

उनले यस कुरामा तीन वटै सरकारको ध्यान जानुपर्नेमा उनीहरुको ध्यान अनुदानमुखी भएको बताए । सिलवालले यसलाई सरकारको ‘नीतिगत अस्पष्टता’को संज्ञा दिए । उनले विभिन्न नाममा भत्ता वितरण गर्नुभन्दा दुई महिना दिने भत्ताले बीमा गरिदिए राज्यलाई कुनै व्ययभार नहुने बताउँदै विकासको मुल मर्मलाई सरकारले समात्न नसकेको बताए । 

आर्थिक क्षेत्रमा कलम चलाउने मिडिया धेरै रहे पनि सत्य समाचार प्रस्तुत गर्ने मिडिया थोरै रहेको बताउँदै सिलवालले कर्पोरेट नेपालसँग प्राधिकरणको लामो सहकार्यको पनि स्मरण गरे । समाचारमा निजी विचार आउन नहुने उनको भनाई छ । सिलवालले निजी विचारको रुपमा समाचार आउन नहुने भन्दै समाचारमा जे सत्य हो, त्यही मात्र आउनुपर्ने बताए । कर्पोरेट नेपाललाई आफ्नो फरकपन कायम राख्न सिलवालले सल्लाह पनि दिए ।