नेपाल–भारत उर्जा बैठकः गोरखपुर–बुटवल प्रसारणलाइनको निर्माण अघि बढाइने

काठमाडौं । नेपाल–भारत उर्जासचिवस्तरीय संयुक्त सञ्चालक समितिको बैठकमा ४०० केभी गोरखपुर–बुटवल अन्तरदेशीय प्रसारणको निर्माण अघि बढाउने सहमति भएको छ । बिहीबार र शुक्रबार दुई दिन भएको बैठकमा उक्त प्रसारणलाइनको वित्तीय मोडालिटिबारेमा सहमति भइसकेकोले अब निर्माण अघि बढाइने भारतीय दूतावासले जारी गरेको विज्ञप्तिमा जनाइएको छ । 

भारतका उर्जासचिव संजीव नन्दन सहाय र नेपालका उर्जासचिव दिनेश घिमिरेले आ–आफ्नो  टोलीको अध्यक्षता गरेको भर्चुअल बैठकले उर्जा क्षेत्रको विकासका लागि दुवै देशका सरकारले निकटमा रहेर समन्वय गरिरहेकाले गएको पाँच वर्षमा यस क्षेत्रमा उल्लेख्य प्रगति भएको निष्कर्ष निकाल्दै दक्षिण एसियाको पहिलो ४०० केभी क्षमताको अन्तरदेशीय मुजफ्फरपुर–ढल्केबर विद्युत प्रसारण लाइनको निर्माण सम्पन्न भएको बताएको छ । 

दुई देशबीच उर्जाको क्षेत्रमा भएका सहकार्यलाई थप मजबुत बनाउने लगायत एकीकृत ग्रीडको विकास एवम् विस्तार, आवश्यकता अनुसार थप अन्तरदेशीय विद्युत प्रसारण लाइनको निर्माण, नेपालको जलविद्युत तथा सौर्य उर्जा परियोजनामा लगानी लगायतका प्रतिबद्धता दोहोर्याइएको छ ।  नेपालका लागि भारतका राजदूत विनय मोहन क्वात्रासमेत सहभागी बैठकमा दुवै क्षेत्रका उर्जासम्वद्ध निकायका प्रतिनिधिहरु सहभागी थिए । हिजो सहसचिवस्तरीय बैठक सम्पन्न भएपछि आज सचिवस्तरीय बैठक गरिएको जनाइएको छ ।

यो समिति दुई देशका सरकारबीच उर्जाको क्षेत्रमा भएका विभिन्न प्रयासलाई विस्तार एवम् समन्वय गर्ने सर्वोच्च द्विपक्षीय संयन्त्र हो । बैठकमा उर्जा क्षेत्रमा भएका द्विपक्षीय पहल तथा प्रयासका प्रगतिबारे समीक्षा गरिएको जनाउँदै भारतीय पक्षले नेपाली उर्जा उत्पादकको भारतीय बजारमा पहुँच विस्तार गर्न तर्जुमा भएका उपयुक्त नियमावली तथा निर्देशिका, इनर्जी बैंकिङको विकास, अन्तरदेशीय प्रसारण लाइनको विकासबारे छलफल हुनुका साथै अरुण तेस्रो जलविद्युत परियोजनाको प्रगतिको समीक्षा गरिएको जानकारी दिइएको छ ।