आइतबार २३ बैशाख, २०८१ | Sunday May 05, 2024
काठमाडौं । सहकारीमा फसेका निक्षेपकर्ताको रकम फिर्ता गर्न शीघ्र पहल गरिने भएको छ । उपप्रधान एवं गृहमन्त्री नारायणकाजी श्रेष्ठले सहकारीमा देखिएको समस्या समाधान गर्ने उद्देश्यले डाकेको बैठकमा यस्तो निर्णय भएको हो ।
बैठकले समस्याग्रस्त सहकारी व्यवस्थापन समितिलाई आवश्यक पर्ने जनशक्ति व्यवस्थापन गरी उपसमितिमार्फत तोकिएको सहकारीको चल, अचल सम्पत्तिको लेखाजोखा, लिलामसमेत गरेर निक्षेपकर्ताको निक्षेप फिर्ता गर्न शीघ्र पहल गर्ने निष्कर्ष निकाले हो । साथै, बैठकले बचत तथा कर्जा सुरक्षण कोष छिटो सञ्चालन गर्न आवश्यक पहल लिने निर्णय गरेको छ ।
गृह मन्त्रालयमा बुधबार आयोजित बैठकमा गृहसचिव, भूमि व्यवस्था तथा सहकारी मन्त्रालय सचिव, सहकारी विभागको रजिष्ट्रार, सहकारी क्षेत्र सुधार सुझाव कार्यदलको संयोजक–सदस्य, गृह मन्त्रालयका सहसचिव, अर्थ मन्त्रालयका सहसचिवलगायतको उपस्थिति रहेको थियो ।बैठकले सहकारी विभागले नियमित नियमन गर्ने र अनुसन्धानबाट प्राप्त प्रारम्भिक प्रतिवेदन आवश्यक कारबाहीका लागि कारबाही गर्ने निकायसमक्ष अविलम्ब पठाउने तथा नियामक निकाय गठन आदेशमार्फत गठन गरी कार्य प्रारम्भ गर्नुपर्ने निर्णय गरेको छ ।
प्रधानमन्त्री पुष्पकमल दाहालले यसअघि नै उक्त सन्दर्भमा दिएको निर्देशनबमोजिम नै उपप्रधानमन्त्री श्रेष्ठले निर्णयको अग्रसरता लिएका हुन् ।
