सोमबार १७ बैशाख, २०८१ | Monday Apr 29, 2024
चितवन । भौतिक पूर्वाधार तथा यातायातमन्त्री प्रकाश ज्वालाले पूर्व–पश्चिम रेलमार्गको भरतपुर क्षेत्रमा सर्भे स्थगन भएको बताएका छन् । भरतपुर महानगरपालिकाले आयोजना गरेको पूर्व–पश्चिम रेलमार्गको सर्भेका क्रममा भरतपुर महानगरपालिका क्षेत्रभित्र देखिएका समस्याका सम्बन्धमा आयोजित छलफलका क्रममा उनले स्थानीयको चाहनाविपरीत रेलमार्ग नबन्ने बताए ।
रेलमार्गको विकल्प दिन आग्रह गर्दै उहाँले नयाँ विकल्पका विषयमा छलफल अघि बढ्ने र भरतपुर महानगरपालिकाले दिएको विकल्पबारे प्राविधिक रूपमा अध्ययन गरिने उनको भनाइ थियो । ‘योभन्दा उपयुक्त विकल्प दिन म यहाँहरूलाई अनुरोध गर्दछु,’ मन्त्री ज्वालाले भने, ‘महानगरपालिकाले दिएको विकल्पबारे मन्त्रालयले मात्रै गरेर नहुने भएकाले प्रधानमन्त्रीसँग पनि छलफल गरिनेछ ।’
महानगरपालिकाकी प्रमुख रेनु दाहालले अहिले रेखांकन गरिएको रेलमार्गमा घना बस्ती भएको र आठ सयभन्दा बढी घरधुरी पर्ने भन्दै नयाँ विकल्प प्रस्ताव गरिएको बताइन् । महानगरका तर्फबाट वडा नं ११ र १२ को वन क्षेत्रको छेउ हुँदै रेलमार्ग बनाउँदा छोटो र कम लागतमा बन्ने र यसरी रेलमार्ग बनाउँदा नारायणीको साँघुरो क्षेत्रबाट पार गर्न सकिने उनको तर्क थियो ।
महानगरपालिकाका उपप्रमुख चित्रसेन अधिकारीले अहिले रेखांकन भएका क्षेत्रबाट रेलमार्ग सम्भव नहुने भएकाले महानगरले कार्यक्रमको आयोजना गरेको बताए । सो अवसरमा भौतिक पूर्वाधार तथा यातायात मन्त्रालयका सचिव केशव शर्मा र रेल विभागका महानिर्देशक रोहितकुमार बिसुरालले स्थानीयको सहमतिबिना रेलमार्ग नबन्ने आश्वासन दिए ।
कार्यक्रममा बागमती प्रदेशसभा सदस्य, प्रदेशसभाका पूर्वमन्त्री, प्रमुख राजनीतिक दलका जिल्ला अध्यक्ष एवं संयोजक र पूर्वसभापति, रेलमार्ग संघर्ष समितिका संयोजक एवं प्रतिनिधि, निजी क्षेत्रका व्यवसायीलगायतको उपस्थिति थियो । स्थानीयले रेलमार्गको विकल्प खोज्नुपर्ने अडान राखेपछि महानगरपालिकाले छलफल आयोजना गरेको हो । कार्यक्रममा सहभागी दलका नेता र सरोकारवालाले अहिले भइरहेको रेलमार्गको रेखांकन स्थागन नभएर रद्द नै गरिनुपर्नेमा जोड दिएका थिए ।
