राजनीति बिग्रिएकोले रास्वपाले हस्तक्षेप गरेको होः परियार, ‘इलाम– २ मा हामी नै जित्छौं’

काठमाडौं । राष्ट्रिय स्वतन्त्र पार्टीका प्रमुख सचेतक सन्तोष परियारले बिग्रेको राजनीतिक परिस्थितिलाई राष्ट्रिय स्वतन्त्र पार्टीले हस्तक्षेप गरेर नयाँ गठबन्धन बनेको बताएका छन् । 

बिहीवार संसदमा उनले बिग्रिएको राजनीतिक परिस्थितिलाई पार्टी सभापति रवि लामिछानेको पहलमा हस्तक्षेप गरिएको बताए । परिवारले रास्वपाले नयाँ गठबन्धन बनाउन मुख्य भुमिका खेलेको बताए । उनले पुराना पार्टीहरुले सदनमा प्रतिष्पर्धा र निर्वाचनमा सहकार्य गर्ने गरेका भन्दै आगामी दिनमा निर्वाचनमा प्रतिष्पर्धा र सदनमा सहकार्य गर्नुपर्ने बताए । 

परियारले थपे, ‘तत्कालिन समयको, आजको हाम्रो समयको पेचिलो मुद्दाहरुलाई बुझेर समाज रुपान्तरणको विचारसहित नयाँ हस्तक्षेप गर्न आएका छौँ भनेर हामीले भनेका थियौँ । म जानकारी गराउन चाहन्छु, बिग्रेको राजनीतिक परिस्थितिलाई आज हाम्रो पार्टीका सभापतिको पहलमा हामीले हस्तक्षेप गरेका छौँ । र हामीले यो नयाँ गठबन्धन बनाउनमा मुख्य भुमिका खेलेका छौँ । हामी त सदनमा सहकार्य गरौँ भन्न चाहन्छौँ । निर्वाचनमा प्रतिष्पर्धा गरौँ भन्न चाहन्छौँ । तर हाम्रो संसदीय अभ्यासमा हिजोदेखि तपाईहरुले के गर्नुभयो ? सदनमा सधैँ प्रतिष्पर्धा गर्नुभयो । र निर्वाचनमा गएर सहकार्य गर्नुभयो । जसले गर्दाखेरी, लोकतन्त्रलाई पनि कमजोर बनाइदिनु भयो । म जानकारी गराउन चाहान्छु, एउटा दुखद घटनाका कारण इलाममा निर्वाचन हुँदैछ । राष्ट्रिय स्वतन्त्र पार्टी भन्न चाहान्छ, इलामको निर्वाचनमा हामी प्रतिष्पर्धा गरौँ । सहकार्य नगरौँ । राष्ट्रिय स्वतन्त्र पार्टी एक्लै उभिएर त्यो निर्वाचनमा प्रतिष्पर्धा गर्छ । राष्ट्रिय स्वतन्त्र पार्टीले इलाम २ को निर्वाचन जित्छ पनि ।’

उनले आफूहरु प्रश्न गर्ने मात्रै नभइ समस्याको समाधान गर्न पनि सरकारमा सामेल भएको बताए । विगतमा नेपाल बनाउन शुरु नै नगरिएको जिकिर गर्दै उनले अब नेपाल बनाउने काम शुरु हुने बताए ।