डेढ महिनामा बैंकहरुले राष्ट्र बैंकमा राखे ८ खर्ब २७ अर्ब निक्षेप

काठमाडौं । बैंक तथा वित्तीय संस्थाहरुले नेपाल राष्ट्र बैंकमा स्थायी निक्षेप सुविधा अन्तरगत ८ खर्ब २७ अर्ब ३५ करोड रुपियाँ पैसा जम्मा गरेको देखिएको छ । फागुन १ गते यता २२९ पटक गरी बैंक तथा वित्तीय संस्थाहरुले सो बराबरको निक्षेप राष्ट्र बैंकमा राखेका हुन् ।

बैंकहरुले जम्मा गर्ने र झिक्ने गर्दै पछिल्लो डेढ महिनामा सो बराबरको निक्षेप राष्ट्र बैंकमा जम्मा गरेका हुन् । अहिले राष्ट्र बैंकमा यस अन्तरगतको खुद निक्षेप (बक्यौता) भने ६७ अर्ब ९५ करोड रुपियाँ मात्रै छ । यो निक्षेप आउँदो शुक्रबार परिपक्क हुन्छ, त्यसपछि बैंकहरुले व्याजसहित रकम फिर्ता  पाउने छन् । त्यसपछि उनीहरुले आइतबार पुनः यस्तो निक्षेप राष्ट्र बैंकमा जम्मा गर्न सक्नेछन् । 

अहिले कर्जा माग नभएर पैसा थुप्रीएको अवस्थामा राष्ट्र बैंकको यो सुविधाबाट बैंकहरुलाई राहत मिलेको बैंकरहरु बताउछन् । तरलता व्यवस्थापनमा यो उपयुक्त माध्यम मानिन्छ । यसमा बैंकहरुले राष्ट्र बैंकले आह्वान नगर्दापनि तोकिएको दिनमा बोलकबोल बिना नै निक्षेप राख्न सक्छन् । यसअघि राष्ट्र बैंकले आह्वान गरेको अवस्थामा मात्रै बैंकहरुले बोलकबोल गरेर निक्षेप राख्न पाउने थिए । 

यद्यपि, राष्ट्र बैंकले यो सुविधाका लागि बिभिन्न मापदण्ड भने तोकेको छ ।  बैंकहरुमा अन्तरबैंक सापटीको बक्यौता नभएको, पछिल्लो ३० दिनसम्म दैनिक कर्जा निक्षेप अनुपात (सिडी रेसियो) र दैनिक खुद तरल सम्पत्ति पनि तोकिएको सिमा भित्र रहेका हुनुपर्नेछ । यस्तै बचत निक्षेपमा प्रदान गर्न प्रकाशित न्यूनतम ब्याजदर पनि ३ प्रतिशत भन्दा कम नभएको हुनुपर्ने शर्त तोकिएको छ । 

यी शर्त पुरा भएको अवस्थामा बैंकहरुले न्यूनतम २० करोड रुपियाँ र सोभन्दा बढीको हकमा ५  करोडले भाग गर्दा निःशेष रहने अंक बराबरको रकम राष्ट्र बैंकमा जम्मा गर्न सक्नेछन् ।